სასწავლო წლის განახლებამდე არლის სკოლის მშენებლობა დასრულდება

მშენებელი კომპანიის „Rooms–ის“ წარმომადგენელი დავით მუმლაძე ამბობს, რომ სამშენებლო სამუშაოები აქტიურად მიმდინარეობს: „გარე სტადიონზე ხელოვნურ ბალახას ვაგებთ. შიდა სპორტულ დარბაზში კი კედლებს ვღებავთ. წყლისა და კანალიზაციის სისტემა გაყვანილია, ახლა კაფელს ვაკრავთ. ამის მერე სამუშაოები მხოლოდ გარეთ დარჩება, ეზოში მიწა უნდა მოვჭრათ და ასფალტი დავაგოთ“.

მისი თქმით, 15 სექტემბრამდე ყველა სამუშაო დასრულდება: „ ჯერ ვადა არ გადაგვიცილებია, ახალი სასწავლო წლის დაწყებამდე ყველაფერს მოვასწრებთ“.

შეგახსენებთ, რომ არლის საჯარო სკოლის მშენებლობა 2015 წლის დასაწყისში დაიწყო. მშენებლობა ერთ წელიწადში უნდა დასრულებულიყო. სამუშაოებს ტენდერში გამარჯვებული კომპანია შპს "Civil Construction" ასრულებდა, თუმცა მისი ხელმძღვანელის გარდაცვალების გამო, მშენებლობა შეჩერდა და ის რაც უკვე გაკეთებული იყო, ნადგურდებოდა. ამ პერიოდში, ახალი მშენებლის შესარჩევად გამოცხადებული ტენდერი პირველ მცდელობაზე ჩავარდა და მშენებლის შერჩევაც დაგვიანდა. ამ ეტაპზე სკოლაში სამშენებლო სამუშაობს კომპანია „Rooms–ი“ ასრულებს. სკოლის მშენებლობის დასრულებისთვის 540 000 ლარია გათვალიწინებული.

არლის ახალი სკოლა 192 მოსაწვლეზეა გათვლილი. შენობა ადაპტირებულია შშმ პირებისთვის. მშენებლობის დასრულებამდე მოსწავლეები სოფელში არსებულ კათოლიკურ და მართლმადიდებლურ სამრევლო სკოლების შენობებში არიან გადანაწილებული.

[თინათინ ზაზაძე, ადიგენი]