მიტროპოლიტი თეოდორე ვალეში მომხდარზე: ‘ეს ეკლესიის შეურაცხყოფაა’

მიტროპოლიტი თეოდორე ჭუაძე ვალეში მომხდარს ვანდალიზმად აფასებს: „ეს არის დანაშაული და შეურაცხყოფა ეკლესიისა, ხატებისა და იმ სიწმიდნეებისა, რომლებსაც ჩვენ ვეთაყვანებით“.

იგი ფიქრობს, რომ ეს ხალხის დასაპირისპირებლადაა გაკეთებული და ასეთი რამ მხოლოდ ქვეყნის მტერს შეიძლება აწყობდეს. მაგრამ, არ აკონკრეტებს, ვის გულისხმობს მტერში: „ქვეყანას ჰყავს მტრები და ისინი არეულობის გამოწვევას ცდილობენ. მიუხედავად ამისა, ვფიქრობ, რომ ეს დაპირისპირებას ვერ გამოიწვევს. ხალხი გონიერია, მათ იციან, რომ ამას ჭკუათმყოფელი ადამიანი შეგნებულად არ იზამდა“.

მიტროპოლიტი თეოდორე ამბობს, რომ შესაძლოა დამწვარ ხატებსა და ლოცვებს შორის მართლმადიდებლურიც იყო: „არ ვიცი ვინ გაარჩია, რომ მხოლოდ კათოლიკური დაიწვა. რაც არ უნდა იყოს, ამ ფაქტს გამოძიება სჭირდება. სამართალდამცავებმა უნდა დაადგინონ რა მოხდა“.

მისი თქმით, სალოცავი მართლმადიდებელი ეკლესიის დაქვემდებარებაში არაა: „ჩვენ არ შევდივართ იქ, არ აღევლინება წირვა–ლოცვა, უბრალოდ ადამიანები შედიან, ანთებენ სანთლებს. ხატები და ლოცვებიც მათი შეტანილია“.

მიტროპოლიტი ხალხს მოუწოდებს, დაეხმარონ გამოძიებას იმის დადგენაში, რა მოხდა, ასევე ლოცვა გააძლიერონ: „მე მოვუწოდებ ხალხს და ვთხოვ, რომ არ აყვნენ პროვოკაციებს და მიეხმარონ გამოძიებას, რომ გამოძიებულ იქნეს ეს ფაქტი. ასევე უნდა ვილოცოთ, რომ უფალმა გვაპატიოს ის უღირსობები, რომელსაც ჩვენი თანამოქალაქეები ჩადიან“.

შეგახსენებთ, რომ 12 მარტს, დაახლოებით 18:00 საათზე, ვალეში მდებარე ქრისტიანულ სალოცავში, რომელშიც კათოლიკეები და მართლმადიდებლები მრავალი წელია ერთად ლოცულობენ, კათოლიკური ხატები და ლოცვის წიგნები დაწვეს.

მომხდარზე ძიება შინაგან საქმეთა სამინისტრომ რელიგიური საქმიანობისთვის ხელისშეშლის მუხლით დაიწყო.

[თამუნა უჩიძე, ახალციხე]