სოფელ მინაძეში ავარიის შედეგად ორი ადამიანი დაშავდა

ავარია სოფელ მინაძეში, 11 მარტს დილით მოხდა. "ფორდის" მარკის მიკროავტობუსი ხეს შეეჯახა, გზის სავალი ნაწილიდან გადავიდა და ამობრუნდა.

"საპირისპირო მიმართულებით მანქანა მოდიოდა დიდი სისწრაფით, იმას ავაცილე, გზიდან გადავედი და ასე მოხდა", - ამბობს მიკროავტობუსის მძღოლი.

მიკროავტობუსი სამგზავრო არ იყო, თუმცა მძღოლს თან ორი პირი ახლდა. ორივე მათგანი სასწრაფო სამედიცინო დამხარების ჯგუფმა საავადმყოფოში გადაიყვანა.

"ერთის მდგომარეობა საშუალო სიმძიმისაა, მეორე მსუბუქადაა დაშავებული.გამოკვლევები უტარდებათ", - აცხადებენ ახალციხის რეფერალურ საავადმყოფოში.

შინაგან საქმეთა სამინისტრომ ძიება სისხლის სამართლის კოდქსის 276-ე მუხლით დაიწყო, რაც ავტო-საგზაო მოძრაობის წესების დარღვევას გულისხმობს.

[sknews.ge]