რატომ დაიწყო ფინანსური კრიზისი ახალციხის პროფსასწავლებელში?

”პროფესიული განათლების ვაუჩერული დაფინანსების პროგრამა” გასულ წელს, პრეზიდენტის ინიციატივით დაიწყო. ათასლარიანი ვაუჩერები იმ სოცაილურად დაუცველმა ოჯახებმა მიიღეს, რომლებსაც მინიჭებული ქონდათ 100 ათას ქულაზე ნაკლები. დანარჩენები მხოლოდ 70 პროცენტით დაფინანსდნენ და უფლება ჰქონდათ გამოცდის წარმატებით ჩაბარების შემთხვევაში, დარჩენილი 30 პროცენტიც მოეპოვებინათ.

ახალციხის პროფესიული გადამზადების ცენტრმა სხვადასხვა სპეციალობაზე 100 სტუდენტი მიიღო. ამ ეტაპზე აღნიშნული პროგრამით სტუდენტების ნაწილი ისევ სწავლობს.

”პროფესიული განათლების ვაუჩერული დაფინანსების პროგრამის” დაწყების შემდეგ თითქმის ყველა პროფესიული სასწავლებელი მძიმე ფინანსურ კრიზისს განიცდის, რადგან მათ პროგრამის ამოქმედებისთანავე ყველანაირი სახელმწიფო დაფინანსება შეუწყდათ და მხოლოდ 1000-ლარიანი ვაუჩერის იმედად დარჩნენ. მსგავს მდგომარეობაშია ახალციხის პროფესიული გადამზადების ცენტრიც.

”ამ 1000 ლარში შედიოდა ადმინისტრაციული ხარჯები, მასწავლებლების ხელფასები, კომუნალური გადასახადები და სხვა ყველა ის ხარჯი, რაც სტუდენტს სჭირდება სპეციალობის დასამთავრებლად. ისე ჩანდა, თითქოს და პროფსასწავლებლებს მას მერე კარგი დაფინანსება ჰქონდათ, არადა ჩვენ ყველა სუბსიდია შეგვიწყდა”,- ამბობს ახალციხის პროფესიული გადამზადების სასწავლებლის დირექტორი ბელა ავალიშვილი.

მისივე თქმით, ამის გამო სასწავლებლის ბიუჯეტი მესამედი გახდა და პედაგოგებს ხელფასები შეუმცირდათ.

ავალიშვილი ამბობს, რომ პროგრამა ისევ უნდა გაგრძელდეს. თუმცა, დაფინანსების სისტემა შეიცვლება და პროგრამების მიხედვით იქნება.

”შედუღება საკმაოდ ძვირიანი სპეციალობაა, ვიდრე სამკურნალო მცენარეების მოვლა-მოყვანის სპეციალობა, ამიტომ არ შეიძლება ამ ორ სპეციალობას ერთნაირი დაფინანსება ჰქონდეს. პროგრამული დაფინანსება იმით იქნება კარგი, რომ ყველა სპეციალობისთვის თანხა საჭიროების მიხედვით გამოიყოფა”, - ამბობს ავალიშვილი.

[მანანა სარაშვილი, ახალციხე]