რას სთავაზობს ‘ოპიზარი’ სტუდენტებს

პროფესიული განათლების მიღების მსურველთა რეგისტრაცია „ოპიზარში“ უკვე დაიწყო. 29 აგვისტოს სასწავლებელმა საზოგადოებრივი კოლეჯის სტატუსი მოიპოვა, რის შემდეგაც კოლეჯს უმაღლესი პროფესიული პროგრამების განხორციელების უფლება მიენიჭა.

„ადრე მხოლოდ სამ საფეხურიან პროგრამებს ვახორციელებდით, ახლა უკვე ოთხ საფეხურიანი პროგრამებიც გვაქვს. დაგვემატა 4 ახალი სპეციალობა, ესენია: ხის მხატვრული დამუშავება, ინტერნეტტექნოლოგია, ვეტერინარული მომსახურების სპეციალისტი და ფერმერი“, – ამბობს კოლეჯის დირექტორი ბელა ავალიშვილი.

მისივე თქმით, რამდენიმე დღეში კოლეჯში სარემონტო სამუშაოები იწყება. შენობა ადაპტირებული უნდა გახდეს შეზღუდული შესაძლებლობების მქონე პირებისთვის: „იცვლება კოლეჯის ღობე, შენობის გარეთ კეთდება ახალი, სტანდარტული პანდუსი და ლიფტი, ასევე კეთდება ადაპტირებული სველი წერტილები. განათლების სამინისტრო უკვე მუშაობს ამ საკითხზე, სამუშაოები რამდენიმე დღეში დაიწყება. 2015 წელს კი დაგეგმილია სტუდენტებისთვის საერთო საცხოვრებელის გაკეთება და თითქმის ყველა სპეციალობისთვის სახელოსნოებისა და ლაბორატორიების მოწყობა“.
კოლეჯში სწავლის მსურველებისთვის რეგისტრაცია 6 სექტემბერს დაიწყო 20 სექტემბრამდე გაგრძელდება. ამ ეტაპზე სხვადასხვა სპეციალობებზე უკვე 86 სტუდენტია რეგისტრირებული.

სტუდენტები ტესტირების საშუალებით შეირჩევიან. ტესტირება 5 ოქტომბერს ჩატარდება, სწავლა კი 20 ოქტომბერს დაიწყება.

[მანანა სარაშვილი, ახალციხე]