ბორჯომის ორი სოფელი მთის სტატუსს მიიღებს

გადაწყვეტილება მთის განვითარების ეროვნული საბჭოს მეშვიდე სხდომაზე მიიღეს, რომელიც პირველი ვიცე-პრემიერის, ეკონომიკისა და მდგრადი განვითარების მინისტრის დიმიტრი ქუმსიშვილის ხელმძღვანელობით გაიმართა.

უახლოეს პერიოდში აღნიშნული საკითხი მთავრობის სხდომაზე გავა და ორივე სოფელს მაღალმთიანი დასახლების სტატუსი ოფიციალურად მიენიჭება. მიუხედავად ამისა, ადგილობრივები შეღავათებით 2019 წლის 1 იანვრამდე ვერ ისარგებლებენ.

„როდესაც მიმდინარე წელს ხდება დამატება მაღალმთიან დასახლებათა ნუსხაში, ბუნებრივია, ამის შედეგად წარმოშობლი ხარჯი მიმდინარე წელს სახელმწიფო ბიუჯეტში გათვალიწინებული არ არის. ამიტომ, მისი გათვალისწინება მოხდება 2019 წლის 1–ლი იანვრიდან“, – ამბობს მთის განვითარების ეროვნული საბჭოს მდივანი ოთარ კონჯარია.

მისივე თქმით, ამ პერიოდში მუნიციპალიტეტი და სამხარეო ადმინისტრაცია იზრუნებს ამ სოფლების მოსახლეობის ინორმირებულობაზე, ასევე მიანიჭებენ ამ სოფლებში მცხოვრებ ადგილობრივებს მაღალმთიან დასახლებაში მცხოვრები პირის სტატუსს.

საკირესა და ტაძრისის მოსახლეობა მაღალმთიანი დასახლების სტატუსს წლებია ითხოვს. კითხვაზე – რატომ ვერ მიიღო ამ სოფლებმა სტატუსი აქამდე, ოთარ კონჯარია ამბობს, რომ მუნიციპალიტეტის მიერ წარდგენლი დოკუმენტები ცენტრალური უწყებების მიერ წარდგენილ მონაცემებს არ ემთხვეოდა.

მისივე თქმით, დასახლება, რომელიც ზღვის დონიდან 1000 მეტრზე მაღლაა, სამი კრიტერიუმიდან ერთ–ერთს უნდა აკმაყოფილებდეს. დამატებითი გადამოწმების შემდეგ აღმოჩნდა, რომ საკირე და ტაძრისი სასოფლო კრიტერიუმს აკმაყოფილებდა, რაც გულისხმობს, რომ სახნავი მიწების 50%–ზე მეტი არ მუშავდება სტანდარტული ტექნიკით, რომელიც ბარში მუშაობს: „მუნიციპალიტეტმა და სამხარეო ადმინისტრაციამ, სოფლის მეურნეობის სამინისტროსთან ერთად, მოიწვიეს სპეციალისტები და ადგილზე გადაამოწმეს, ანუ კრიტერიუმები დაზუსტდა. ეს კი იძლევა საფუძველს დასახლებას მაღალმთიანის სტატუსი მიანიჭოს“.

მისივე თქმით, გარდა ამ ორი სოფლისა, კიდევ რამდენიმე დასახლებაზე იყო შუამდგომლობები და გადამოწმდა, თუმცა მათ ვერცერთი კრიტერიუმი ვერ დააკმაყოფილეს: „ეს პროცესი არ არის დახურული. ორი წლის განმავლობაში ძირეულად მოვიცავით და გავადამოწმეთ ის დასახლებები, რომელზეც იყო შუამდგომლობები. დამატებითი დაზუსტების შემდგომაც კი აღმოჩნდა, რომ ვერ აკმაყოფილებენ კრიტერიუმებს“.

სამცხე–ჯავახეთში 'მთის კანონი' ჯამში უკვე 224–მდე დასახლებას ეხება.

მაღალმთიანი დასახლების სტატუსს, მთის განვითარების ეროვნული საბჭოს მეშვიდე სხდომის გადაწყვეტილებით, სამცხე-ჯავახეთის, იმერეთის, შიდა და ქვემო ქართლის რეგიონების 15 სოფელი მიიღებს – საკირე, ტაძრისი, ხანი, ლიჩი, მუხურა, მელუშეეთი, ბეგიაური, მანდაეთი, წყალშავი, ზვარე, ჩრდილი, საწისქვილო, გედსამანია, ღოღეთი და ბრდაზორი.

[თინათინ ზაზაძე, ახალციხე]