მაღალმთიანი დასახლებების ნუსხა გაიზარდა, თუმცა სიაში სამცხე–ჯავახეთის სოფლები ვერ მოხვდა

ამის შესახებ „სამხრეთის კარიბჭეს“ რეგიონული განვითარებისა და ინფრასტრუქტურის სამინსიტროში განუცხადეს. „სამწუხაროდ სამცხე–ჯავახეთიდან არცერთი სოფელი არ დამატებია იმას რაც იყო. თქვენი რეგიონის სოფლები ვერ აკმაყოფილებდა ყველა მოთხოვნას“.

მთის განვითარების ეროვნული საბჭოს გადაწყვეტილებით სტატუსი მიენიჭა საქართველოს მასშტაბით 28 დასახლებულ პუნქტს , ასევე ხელვაჩაურის მუნიციპალიტეტის მაჭახელის ხეობის 9 სოფლს, ჯამში 37 სოფელს.

სამცხე–ჯავახეთში 'მთის კანონი' 222 დასახლებას ეხება. ჯავახეთს სრულად და მესხეთს ნაწილობრივ.

ადიგენის, ახალციხის, ბორჯომის და ასპინძის მუნიციპალიტეტებში მაღალმთიანი დასახლების სტატუსის გარეშე 40 სოფელია დარჩენილი. ადიგენის მუნიციპალიტეტის გამგეობა მაღალმთიანის სტატუსის მინიჭებას 24 სოფელზე ითხოვდა, ასპინძა 2 –ზე, ახალციხე 16– ზე, ხოლო ბორჯომი 15 –ზე.

რატომ ვერ მოხვდა მაღალმთიანი სოფლების ნუსხაში სამცხე–ჯავახეთის სოფლები და რომელი კრიტერიუმი ვერ დააკმაყოფილა რეგიონიდან გაგზავნილმა მონაცემებმა, ამ კითხვებზე პასუხის მისაღებად „სამხრეთის კარიბჭე“ მხარის გუბერნატორსა და მთის განვითარების ეროვნული საბჭოს წევრს აკაკი მაჭუტაძეს დაუკავშირდა.

„ახალ შეხვედრაზე ვარ და მოგვიანებით გიპასუხებთ“, – გვითხრა მან.

საქართველოს 3 700 დასახლებიდან, მაღალმთიანი დასახლების სტატუსი ჯამში 1678 დასახლებას აქვს მინიჭებული, დაახლოებით, 45%-ს.

[თინათინ ზაზაძე, ახალციხე]