ბორჯომში ისევ ხმაურია – თანამშრომლები ზაზა ჩაჩანიძის გადადგომას ითხოვენ [Video]

მთავარი → სიახლე, პოლიტიკა 28.02.2018

მიუხედავად იმისა, რომ ბორჯომში ხელფასების საკითხი დამტკიცდა, შენობაში ისევ ხმაურია – მერიის თანამშრომლებმა ამჯერად ცენტრალური შესასვლელი ჩაკეტეს სავარძლებით, ითხოვენ საკრებულოს თავმჯდომარის გადადგომას და სხდომის ოქმს, იმის დასტურად, რომ ხელფასების საკითხი დადებითად გადაწყდა.

"გადადექი" – სკანდირებენ საკრებულოს თავმჯდომარის ზაზა ჩაჩანიძის მისამართით ბორჯომის მერიის თანამშრომლები, რომლებიც შენობის ფოეიში სხედან.

ამავდროულად, ისინი საკრებულოსგან ოფიციალური დოკუმენტს ითხოვენ ხელფასების დამტკიცების შესახებ. ამბობენ, რომ ვიდრე საკრებულო ოქმს არ გადაუგზავნით, არ დაიშლებიან.

საკრებულოს აპარატში კი აცხადებენ, რომ სხდომაზე 30 საკითხი იყო გატანილი და დღეს ოქმს ფიზიკურად ვერ გააკეთებენ.

ამდრომდე [20:00 სთ] ისევ კაბინეტში რჩება ზაზა ჩაჩანიძე, რომლის მონაწილეობის გარეშე დამტკიცდა დღის ბოლოს მერიის თანამშრომელთა სახელფასო ანაზღაურების საკითხი. იგი კვლავ არ აკეთებს კომენტარს მედიასთან.

ბორჯომის თვითმმართველობის შენობაში იმყოფება ასევე "ერთიანი ნაციონალური მოძრაობის" წევრი ნიკა მელია. იგი პარტიის წარმომადგენლებთან ერთად არის საკრებულის დარბაზში და ამბობს, რომ მისი აქ ყოფნის მიზანი ოპოზიციის გვერდში დგომაა. იმ ოთახს, სადაც იგი იმყოფება, დაცვის თანამშრომლები იცავენ.

ბორჯომის მერიაშია ამ დრომდე რაიონული სამმართველოს უფროსი ალექსი ჩადუნელი.

შეგახსენებთ, ბორჯომის საკრებულოში უმრავლესობა ოპოზიცის აქვს, – 28 დეპუტატიდან – 15 ოპოზიციის, 13 კი მმართველი გუნდის წევრია. ამ ფაქტის გამო ბორჯომში გასული წლის ნოემბერში, პირველივე სხდომა, ხმაურით დაიწყო, იმ დღიდან დღემდე კი "ოცნება" სხდომებს ბოიკოტის ნიშნად არ ესწრებოდა.

განსაკუთრებით ხმაურიანი ბორჯომში მერიის თანამშრომელთა სახელფასო ანაზღაურების საკითხი აღმოჩნდა. საკრებულოში, დღევანდელ დღემდე, ქვორუმის არარსებობის გამო ხუთჯერ არ შედგა სხდომა, რომელზეც ეს საკითხი უნდა განეხილათ. განსხვავებით წინა სხდომებისგან, დღეს "ქართულმა ოცნებამ" ბოკიოტის რეჟიმი დაარღვია და სხდომაზე მივიდა. თუმცა, დილით გამართულ სხდომაზე საკითხი მაინც ჩავარდა. ამის შემდეგ დაიწყო ბორჯომში შეხლა–შემოხლა, აქცია, ადგილზე საჭირო გახდა სასწრაფო დახმარების გამოძახება, იყო ჩხუბი, რაზეც სამმართველომ ძიება სისხლის სამართლის კოდექსის 126–ე, ძალადობის მუხლით დაიწყო. დღეს ბორჯომში ჩავიდა "ერთიანი ნაციონალური მოძრაობის" წევრი ნიკა მელია, რასაც განსაკუთრებული ხმაური და ჩხუბი მოჰყვა.

დაძაბული დღის ბოლოს, ბორჯომის საკრებულოს 17–მა დეპუტატმა, რომელთა შორის, 13 „ქართული ოცნების“ წევრი იყო, სხდომა გამართა და გაზრდილი სახელფასო ოდენობები დაამტკიცა. სხდომას თავმჯდომარის მოადგილე გიორგი გოგიჩაიშვილი წარუძღვა.

სადაო ეს სახელფასო ოდენობები გახდა: მუნიციპალიტეტის მერი – 2450 ლარი; პირველი მოადგილე – 2 400 ლარი; მერის მოადგილე – 2 300 ლარი და სამსახურების უფროსები – 2000 ლარი.

[sknews.ge]