ახალციხეში მშობლებისათვის შექმნილი ვებ–გვერდის პრეზენტაცია მოეწყო

შეხვედრა დღეს, 23 თებერვალს, ახალციხის ახალგაზრდულ ცენტრში ჩატარდა. ვებ–გვერდის www. forparents.ge და მობილური აპლიკაციის პრეზენტაციას მშობლები და მასწავლებლები დაესწრნენ.

პრეზენტაციის მიზანს, მშობლებისათვის იმ ინოვაციური პლატფორმის გაცნობა წარმოადგენდა, რომელიც ასოციაციამ სპეციალურად მშობლებისათვის შეიმუშავა, რათა მათ შეძლონ საკუთარ შვილებს ასაკობრივად სწორი ინფორმაცია მიაწოდონ რეპროდუქციული ჯანმრთელობის, ჯანსაღი ცხოვრების წესისა და სქესობრივ მომწიფებასთან დაკავშირებული სხვა თანმდევი საკითხების შესახებ.

როგორც ასოციაციის წარმომადგენლებმა შეხვედრაზე განმარტეს, ამჟამადმოზარდებს რეპროდუქციული ჯანმრთელობის შესახებ სკოლებში არასაკმარის ინფორმაციას აწვდიან.

„სკოლებში არაა ცალკე საგანი, სადაც ბავშვებს მისცემს სრულყოფილ ინფორმაციას საკუთარ სხეულში მიმდინარე პროცესების შესახებ, ჩვენ გადავწყვიტეთ შეგვეთავაზებინა მშობლებისათვის ინფორმაციის ალტერნატიული გზა და წყარო“,– ამბობს პროექტის კოორდინატორი სალომე იობაძემ.

შეხვედრაზე საუბარი შეეხო ასოციაცია „ჰერა XXI“–ის მიერ 2017 წელს ჩატარებულ ონლაინ კვლევას, რომელშიც მონაწილეობა 18 წლამდე მოსწავლეებმა მიიღეს. კვლევის მიხედვით, მოზარდებს რეპროდუქციული ჯანმრთელობისა და უფლებების საკითხებზე, ინფორმაციის მიღება სწორედ ოჯახისგან და სკოლისდან სურდათ. სულ 600 მოსწავლე გამოიკითხა.

ანალოგიური კვლევა 2018 წელს ორგანიზაციამ მშობლებს შორისაც ჩაატარა, გამოკითხული 500 მშობლიდან 97%–მა დადებითი პასუხი გასცა, იმას, რომ აღნიშნულ თემებზე საკუთარ შვილებს ინფორმაცია თითონ უნდა მიაწოდონ.

შეხვედრა პროექტის „პარტნიორობის განვითარება სქესობრივი განათლებისათვის საქართველოში“ ფარგლებში გაიმართა.

ასოციაცია “ჰერა XXI” რეპროდუქციული ჯანმრთელობის და ჯანსაღი ცხოვრების წესის შესახება, საქართველოს მოსახლეობაში კამპანიას 1998 წლიდან ახორციელებს.


[მარიამ ბარძიმაძე, ახალციხე]