ბორჯომმა 9.600 ლარი დახარჯა იმ მომსახურებაში, რაც თანამშრომლებს უნდა შეესრულებინათ

ადგილობრივი თვითმმართველი ერთეულის ბიუჯეტის შესრულებისა და ანგარიშგების, ბიუჯეტების პროექტების შედგენის, განხილვის, მიღების, ცვლილების შეტანის, შესრულების, ანგარიშგების, გარე და შიდა აუდიტის ჩატარების თაობაზე ახალი ნორმატიული აქტების, მათში შეტანილი ცვლილებებისა და სხვა მასალების მიწოდებისთვის, – ბორჯომის მუნიციპალიტეტმა, 2015-2016 წლებში, გამარტივებული შესყიდვის საშუალებით, ხელშეკრულება შპს „დაუ+“-სთან გააფორმა.

შპს „დაუ+“-ს საფინანსო-საბიუჯეტო საქმიანობის შესახებ კონსულტაციის მომზადება და მიწოდებაც ევალებოდა.

მთელ ამ მომსახურებაში ბორჯომის მუნიციპალიტეტმა 9500 ლარი გადაიხადა.

სახელმწიფო აუდიტის დასკვნაში ვკითხულობთ, რომ მუნიციპალიტეტის თანამშრომლები ვალდებული არიან გააჩნდეთ კანონმდებლობის სათანადო ცოდნა და შეძლონ მათი საქმიანობაში გამოყენება.

„ბორჯომის მუნიციპალიტეტმა ვერ დაასაბუთა რა აუცილებელი საჭიროებით იყო განპირობებული საკონსულტაციო მომსახურების შესყიდვა, ვინაიდან მუნიციპალიტეტს გააჩნია შრომითი რესურსი და ვალდებულია საკუთარი რესურსებით უზრუნველყოს აღნიშნული საქმიანობის განხორციელება. გამომდინარე აქედან, მუნიციპალიტეტის პასუხისმგებელ პირებს არ უნდა განეხორციელებინათ საკონსულტაციო მომსახურების შესყიდვა და ხარჯის გაწევა“, – ნათქვამია აუდიტის დასკვნაში.

2015-2016 წლებში ბორჯომის მუნიციპალიტეტის საფინანსო-საბიუჯეტო სამსახურსა და იურიდიულ განყოფილებაში სულ დასაქმებული იყო 14 მოსამსახურე, რომელთა შრომის ანაზღაურებამ 409.2 ათასი ლარი შეადგინა. მუნიციპალიტეტის მიერ საკონსულტაციო მომსახურებაზე გადახდილი თანხა, რომელიც 9.6 ათასი ლარია, აუდიტის დასკვნის მიხედვით, არაგონივრული ხარჯია.

[თინათინ ზაზაძე, ბორჯომი]