სტუდენტების ემოციური ექსპედიცია ტაო-კლარჯეთში

ექსკურსია-ექსპედიცია ტაო-კლარჯეთში სტუდუნტური პროექტის ფარგლებში შედგა. პროექტი ტაო-კლარჯეთის ისტორიული ძეგლების შესწავლასა და მონახულებას ითვალისწინებდა. უნივერსიტეტში დაბრუნებულმა ექსკურსიის მონაწილეებმა, დაგეგმეს ღონისძიება, რომელზეც სტუმრებს ფოტოებით აჩვენეს ძეგლების მდგომარეობა და საკუთარი შთაბეჭდილებები გაუზიარეს.

’ეს ღონისძიება ამ პროექტის ერთგვარი გვირგვინი იყო. ღამეები გავათენეთ და საბოლოოდ, ის შედეგი მივიღეთ, რაც გვინდოდა’, - ამბობს პროექტის მონაწილე, ჟურნალისტიკის სპეციალობის მესამე კურსის სტუდენტი მედეა კოპაძე.

პროექტი სტუდენტებმა დეკემბრის თვეში დაწერეს, განხორციელება კი თებერვლიდან დაიწყეს. ტაო-კლარჯეთს, მაისის დასაწყისში, 14-კაციანი შემადგენლობით, სამი დღით ესტუმრნენ.

’ეს იყო ექსკურსია - ექსპედიცია, რომელიც ძეგლების ისტორიის მოძიებით დაიწყო. სტუდენტები აქტიურად ჩაერთვნენ და ძალიან ბედნიერი ვარ, რომ ასეთ ჯგუფთან მომიწია მუშაობა’,- ამბობს უნივერსიტეტის რექტორის მოადგილე, ჯგუფის ხელმძღვანელი ვასილ მოსიაშვილი.

’უნდა წახვიდე და უნდა ნახო, რომ განიცადო ეს’,- შთაბეჭდილებებზე საუბარი უჭირს პროექტის მონაწილე ნათია ყურმაშვილს.

პროექტი უნივერსიტეტის რექტორატისა და თვითმმართველობის მხარდაჭერით განხორციელდა.

[ნინო ზედგინიძე, ახალციხე]