გრანტების გაცემის შესახებ კანონში ცვლილებებს ამზადებენ

ორგანიზაცია „სამოქალაქო საზოგადოების ინსტიტუტის“ იურისტი მარიამ ლაცაბიძე ამბობს, რომ დღეს ქვეყანაში არსებული საზოგადოებრივი ინსტიტუტების საერთაშორისო დაფინანსების წილი 95 პროცენტია, თუმცა, ცუდი მდგომარეობა არც სახელმწიფო ორგანიზაციებიდან გაცემული გრანტების თვალსაზრისითაა, – გრანტებს გასცემენ სამინისტროები, ასევე გრანტის სახით გაიცემა ადგილობრივი ბიუჯეტებიდან პროგრამული დაფინანსების თანხებიც.

„ბევრი საზოგადოებრივი ორგანიზაცია სახელმწიფოსგან გრანტის მიღებას თავს არიდებს, მიზეზს კი იმით ხსნის, რომ უწყებებს ანგარიშგების რთული პოლიტიკა აქვთ. თუმცა, გარკვეულწილად, რადგან ბიუჯეტის ფული იხარჯება, რისკების თავიდან ასაცილებლად, ეს გამართლებულიცაა“, – ამბობს ლაცაბიძე.

მისივე თქმით, „სამოქალაქო საზოგადოების ინსტიტუტის“ მიზანი ისეთი საკანონმდებლო ინიციატივების შემუშავებაა, რომლებიც საზოგადოებრივ ორგანიზაციებს ფინანსურ მდგომარეობას გაუუმჯობესებს: „ერთ–ერთი ასეთი ინიციტივა გულისხმობს მოხალისეობის საგადასახადო რეგულირებას, ამ ეტაპზე მიღებულია კანონი მოხალისეობის შესახებ, თუმცა საგადასახადო ნაწილი არ არის დარეგულირებული. სწორედ ამ მიმართულებით ძალიან კონკრეტული ინიციტივები შევიმუშავეთ“.

საკანონმდელო ინიციტივა ეხება გრანტის ხელშეკრულების ფარგლებში შექმნილი აქტივების გამოყენებას დამხმარე ეკონომიკური საქმიანობისთვისაც.

„დღეს კანონი არ კრძალავს გრანტის ხელშეკრულების ფარგლებში შექმნილი აქტივების გამოყენებას დამხმარე ეკონომიკური საქმიანობისთვისაც, თუმცა კანონში ჩაწერილი ფორმულირება ძალიან ბუნდოვანია, ჩვენი ინიციატივით კი ეს რეგულაციები უფრო ნათელი გახდება“, – აცხადებს ლაცაბიძე.



საკანონმდებლო ინიციატივაზე მომუშავეები ასევე მიიჩნევენ, რომ გრანტის გამცემ სუბიექტებს უნდა დაემატოს მუნიციპალიტეტებიც და თანხის გაცემის პრინციპები ძალიან კონკრეტულად უნდა გაიწეროს.

შეხვედრის მონაწილე არასამთავრობო როგანიზაციების წარმომადგენლების აზრით, ხშირად გრანტები მხოლოდ დედაქალაქში მოქმედი ორგანიზაციებზე გაიცემა, რეგიონებში კი თანხის ძალიან მცირე ოდენობა ნაწილდება: „ბევრჯერ გრანტებს ისე გასცემენ, რომ ამის შესახებ ღიად ცნობილი არ არის. არ გვეძლევა საშუალება დონორს ჩვენი წინადადება შევთავაზოთ და ჩვენი მოსაზრებები გავაცნოთ“.

ასევე, არასამთავრობო ორგანიზაციების წარმომადგენლები ფიქრობენ, რომ კარგი იქნება თუ ყველა საგრანტო განაცხადი ერთ სივრცეში და ერთ ვებგვერდზე მოიყრის თავს, ისე, როგორც ახლა სახელმწიფო შესყიდვების საიტზე ტენდერები ქვეყნდება, ან hr.gov.ge–ზე ვაკანსიების ნახვაა შესაძლებელი.

„ეს ყველაფერი შესაძლებელი იმ შემთხვევაში იქნება, თუ კანონით გავწერთ. როცა სახელმწიფოს ასეთი ვებ–გვერდის გაკეთებას კანონი დაავალდებულებს, გვერდს ვეღარ აუვილიან“, – ამბობს მარიამ ლაცაბიძე.

ამ დროისთვის საკანონმდებლო ინიციატივები ადვოკატირების ეტაპზეა.

„ჩვენი ექსპერტი პარალელურად მუშაობს პარლამენტთანაც“, – აცხადებს ლაცაბიძე.

შეხვედრა „დემოკრატ მესხთა კავშირში გაიამართა“ და ის ორგანიზებული იყო სამოქალაქო საზოგადოების ინსტიტუტის მიერ პროექტ "სამოქალაქო საზოგადოების განვითარების ინიციატივის“ ფარგლებში, რომელსაც ახორციელებს კონსორციუმი კონრად ადენაუერის ფონდის ხელმძღვანელობით, ევროკავშირისა და გერმანიის ეკონომიკური თანამშრომლობის სამინისტროს ფინანსური მხარდაჭერით.



[თამუნა უჩიძე, ახალციხე]