”სამოქალაქო საზოგადოების ინსტიტუტი” არასამთავრობო სექტორს შეხვდა

შეხვედრა ”დემოკრატ მესხთა კავშირის” საკონფერენციო დრბაზში შედგა და მას არასამთავრობო ორგანიზაციაა და ადგილობრივი მედია-საშუალებების წარმომადგენლები ესწრებოდნენ.

”სამოქალაქო საზოგადოების ინსტიტუტი” რეგიონებში ადგილობრივი საზოგადოებრივი ორგანიზაციების განვითარებაზე მუშაობს. ორგანიზაციის წარმომადგენლები მიიჩნევენ, რომ არასამთავრობო სექტორის განვითარებისთვის აუცილებელია ადგილობრივ მედიასთან აქტიური ურთიერთობა. ამ გზით გაიზრდება საზოგადოების ნდობა არასამთავრობო სექტორის მიმართ.

- ”თითქმის 20 წელია. რაც ქვეყანაში არასამთავრობო სექტორი ვითარდება, მაგრამ არაერთხელ ჩატარებული კვლევები გვიჩვენებს, რომ ნდობა ამ ორგანიზაციების მიმართ ისეთი არ არის, როგორც საჭიროა”,- ამბობს ”სამოქალაქო საზოგადოების ინსტიტუტის” საზოგადოებასთან ურთიერთობის მენეჯერი თემურ ჯალიაშვილი და აქვე დასძენს, რომ საზოგადოებამ უნდა გააცნობიეროს, რომ არასამთავრობო ორგანიზაციები მათთვის, მათი პრობლემების მოსაგვარებლად მუშაობენ: ”პირველ რიგში ამაზე თავად ორგანიზაციებმა უნდა იზრუნონ. საჭიროა ახალი იდეების მოძიება”.

”სამოქალაქო საზოგადოების ინსტიტუტის” წარმომადგენლებმა სტუმრებს 2011 წელს ორგანიზაციის მიერ გადაღებული ფილმიც უჩვენეს, სადაც საუბარია იმაზე, როგორი იყო არასამთავრობო ორგანიზაციები ადრე, რას ფიქრობდნენ მათზე მოქალაქეები და რატომ უცხადებდნენ სრულ უნდობლობას.

”ფილმში არის ანალიზი, რატომ არის საზოგადოებაში ასეთი განწყობა. ასევე საუბარია იმაზე, თუ რა უნდა გააკეთონ არასამთავრობო ორგანიზაციებმა იმისთვის, რომ მოიპოვონ საზოგადოების ნდობა და მივიდნენ იმ შედეგებამდე, რისთვისაც არსებობენ”,- ამბობს თემურ ჯალიაშვილი.

”სამოქალაქო საზოგადოების ინსტიტუტმა” ანალოგიური შეხვედრები უკვე გამართა ბათუმში, ოზურგეთში, ზუგდიდსა და ლაგოდეხში. მომდევნო შეხვედრა გორში გაიმართება.

[მანანა სარაშვილი, ახალციხე]