სამოქალაქო სექტორს ევროკავშირის ოთხწლიან პროექტში ჩართვას სთავაზობენ

დღეს, 19 მაისს „ახალციხის ციხეზე“ სამოქალაქო საზოგადოების ინსტიტუტის წარმომადგენლებმა სამცხე–ჯავახეთის არასამთავრობო ორგანიზაციების თანამშრომლებს ევროკავშირის ოთხწლიანი პროექტის შესახებ ინფორმაცია მიაწოდეს. პროექტი, რომლის ბიუჯეტიც ხუთ მილიონს შეადგენს, ევროკავშირისა და გერმანიის ეკონომიკური თანამშრომლობის სამინისტროს მიერ ფინანსდება .

აღნიშნული პროექტი კონრად ადენაურის ფონდის ხელმძღვანელობით ხორციელდება და მასში ჩართულები არიან: სამოქალაქო საზოგადოების ინსტიტუტი, კონსულტაციის და ტრენინგის ცენტრი, საქართველოს სტრატეგიული კვლევებისა და განვითარების ცენტრი, ქუთაისის განათლების განვითარების და დასაქმების ცენტრი.



სამოქალაქო საზოგადოების წარმომადგენლის თემურ ჯალიაშვილის განმარტებით, პროექტის ფარგლებში 79 გრანტი გაიცემა: „პროექტი მიმართული იქნება საქართველოს რეგიონებში საზოგადოებრივი ორგანზაციების გაძლიერებისკენ, სამოქალაქო აქტივიზმის გაძლიერებისკენ და ხელს შეუწყობს სამოქალაქო საზოგადოების ჩამოყალიბებას. ჩატარდება უამრავი ტრენინგი, ერთობლივი ღონისძიებები, გრანტები ოთხი წლის განმავლობაში ეტაპობრივად გაიცემა“.

თუმცა, ვიდრე პროექტის პრეზენტაცია დაიწყებოდა დარბაზში „საზოგადოებრივი ორგანიზაციების ძირითადი პრინციპების დეკლარაციის“ ხელმოწერის ცერემონია გაიმართა. აღნიშნულ დოკუმენტს დღესმდე დაახლოებით 200–მდე ორგანიზაცია აწერდა ხელს, დღეს კი მათ რიცხვს 25 კიდევ შეუერთდა.

„საქართველოს „საზოგადოებრივი ორგანიზაციების ძირითადი პრინციპების დეკლარაცია“ არის საზოგადოებრივი ორგანიზაციების თვითრეგულირების მექანიზმი, დეკლარაციის მიზანია წარმოაჩინოს ის უმთავრესი ღირებულებები, რასაც უნდა ეფუძნებოდეს საზოგადოებრივი ორგანიზაციების საქმიანობა, რათა ხელი შეუწყოთ საქართველოს შემდგომ განვითარებას და ევროპულ ოჯახში სრულფასოვან ინტეგრაციას“, – ნათქვამია დეკლარაციაში.



როგორც თემურ ჯალიაშვილმა განაცხადა, დღეიდან სამცხე–ჯავახეთის საზოგადოებრივი ორგანიზაციები ხელმოწერით უერთდებიან საქართველოს საზოგადოებრივი ორგანიზაციების ძირითად პრინციპებს: „ეს არის ის ღირებულებები, რასაც ჩვენ ვიზიარებთ, რაზეც ჩვენ ვდაგვართ. ამ ღირებულბებით ვიქნებით უფრო ეფექტურები და ხელს შევუწყობთ ქვეყნის და სამოქალაქო საზოგადოების განვითარებას“.

დეკლარაციაზე ხელის მოწერა იმ ორგანიზაციებსაც შეუძლიათ, რომელიც დღევანდელ შეხვედრას ვერ დაესწრნენ, მათ ამის საშუალება „ონლაინ“ შეეძლებათ.

მსგავსი შეხვედრა უკვე გაიმართა ქუთაისსა და შიდა ქართლში.

[თინათინ ზაზაძე, ახალციხე]