2018 წელს ასპინძის ექვს სკოლაში საპირფარეშოებს გაარემონტებენ

განათლებისა და მეცნიერების სამინისტროს ინფორმაციით, 2018 წელს ასპინძის მუნიციპალიტეტის ცხრა სკოლაში სხვადასხვა ინფრასტრუქტურული ღონისძიებების განხორციელებაა დაგეგმილი.

„ამ ეტაპზე სამინისტროსთან სსიპ-საგანმანათლებლო და სამეცნიერო ინფრასტრუქტურის განვითარების სააგენტოს 2018 წლის სამოქმედო გეგმის პროექტის შეთანხმება მიმდინარეობს, სადაც განხილულია ასპინძის მუნიციპალიტეტში სკოლების მშენებლობა და რეაბილტიაცია“, – ვკითხულობთ განათლების სამინისტროდან მიღებულ წერილში.

უწყების ინფომრაციით, 2018 წელს დაბა ასპინძის, ოშორის, ივერიის, ტოლოშის, ნაქალაქევის და დამალის საჯარო სკოლებში სანიტარული კვანძები მოეწყობა. ასევე, ოშორის სკოლაში გაკეთდება კიბე და სამედიცინო თახი, ივერიასა და ტოლოშში კი პანდუსები.

გარდა ამისა, სოფელ საროში მოხდება სკოლის გაზიფიცირება, ორგორაში კი მცირე კონტიგენტიანი სკოლის მშენებლობა დაიწყება.

„აწყვიტის საჯარო სკოლაში განხორციელდება დაფინანსებული სანიტარული კვანძების მოწყობის მონიტორინგი“, – ვკითხულობთ სამინისტროს წერილში.

შეგახსენებთ, რომ 2017 წლის ბოლოს ასპინძის მუნიციალიტეტის 18 საჯარო სკოლიდან 14–ის საპირფარეშო მოუწესრიგებელი იყო. მას შემდეგ რაც ამ თემით „ სამხრეთის კარიბჭე“ დაინტერესდა, საპირფარეშოებს კარები და საკეტები გაუკეთეს.

[თამუნა უჩიძე, ასპინძა]