'მივწერე ყველა სკოლას, რომ პრობლემა მოეგვარებინათ' – ასპინძის სკოლებში საპირფარეშოები შეაკეთეს

რესურსცენტრის უფროსის ტრისტან მურადაშვილის განცხადებით, მას შემდეგ რაც „სამხრეთის კარბჭემ“ მუნიციპალიტეტის სკოლების საპირფარეშოებში არსებული ვითარების შესახებ სტატია გამოაქვეყნა, მან ყველა სკოლას მისწერა და ხარვეზების აღმოფხვრა დაავალა.

სტატიის მიხედვით ასპინძაში საროს, ტოლოშის, ხიზაბავრისა და ოშორის სკოლების საპირფარეშოებს კარები არ ჰქონდა, თმოგვში კი ფანჯარა. სხვა სკოლებში კი ბევრგან საპირფარეშოების კარებს საკეტები არ ჰქონდა.

„მივწერე ყველა სკოლას, რომ ეს პრობლემა მოეგვარებინათ. ამის შემდეგ ყველა სკოლამ, რომლებზეც თქვენ გეწერათ, ვითარება გამოსწორა და ტუალეტს კარი გაუკეთა“, – ამბობს ტრისტან მურადაშვილი.

მისი თქმით, ოშორის სკოლის დირექტორს საპირფარეშოს კარი რესურსცენტრიდან გაატანეს: „როცა რესურსცენტრის შენობა გაარემონტეს, ძველი კარი დაგვრჩა და მივეცით. აბსოლუტურად ყველა სკოლის დირექტორს შეეძლო ამ ვითარების გამოსწორება, მითუმეტეს ტოლოშს ამის საშულება ჰქონდა და ამ საკითხზე ამხელა ამბავი არ უნდა ამტყდარიყო“.

ტრისტან მურადაშვილის განცხადებით, იმ სკოლებში, სადაც კარები იყო, მაგრამ საკეტები არა, საკეტები დაამაგრეს: „ეს ყველაფერი ლიტონი სიტყვები რომ არ ყოფილიყო, სკოლებს ფოტოები გადმოვაგზავნინეთ. ეს მასალა განათლების სამინისტროსაც გადავუგზავნეთ“.

შეგახსენებთ, რომ ასპინძის სკოლების საპირფარეშოები, „სამხრეთის კარიბჭემ“ ნოემბრის ბოლოს გადაიღო. ასპინძაში, 18–დან 15 სკოლაში, საპირფარეშო მოსაწესრიგებელი იყო.

[თამუნა უჩიძე, ასპინძა]