ვანო მერაბიშვილის მხარდასაჭერი პროტესტი მშობლიურ კუთხეში [Video]

აქცია ახალციხის იუსტიციის სახლთან დღის ორი საათზე დაიწყო. ვანო მერაბიშვილის მხარდასაჭერად ძირითადად ახალციხისა და ადიგენის მუნიციპალიტეტის სოფლების: უდისა და არლის მოსახლეობა იყო შეკრებილი.

”ჩვენ შევიკრიბეთ, რათა პროტესტი გამოვხატოთ იმის გამო, რომ ადამიანი, ვინც საფუძველი ჩაუყარა იმ პროექტებს, რომლებმაც ახალციხეს საშუალება მისცა მძლავრი ცენტრი გამხდარიყო საქართველოსი, დღეს დაპატიმრებულია ძალიან უსუსური ბრალდებებით’, - ამბობს ”ერთიანი ნაციონალური მოძრაობის” ახალციხის რაიონული ორგანიზაციის წევრი გელა დემეტრაძე.



აქციაზე იმყოფებოდნენ ”ნაციონალური მოძრაობის” ახალციხის რაიონული ორგანიზაციის წევრები, სამხარეო ადმინისტრაციის თანამშრომლები, სამცხე-ჯავახეთის გუბერნატორი ივანე წიკლაური და მისი მოადგილეები. აქვე იმყოფებოდა ახალციხის მუნიციპალიტეტის საკრებულოს ყოფილი თავმჯდომარე მალხაზ გიქოშვილიც. ასევე ახალციხის მუნიციპალიტეტის მაჟორიტარი დეპუტატი ვაჟა ჩიტაშვილი.



”არ ვართ წინააღმდეგი, რომ ჩატარდეს გამოძიება და დადგინდეს ბრალეულობა ამა თუ იმ პირის, მაგრამ მისი დაკავება მიგვაჩნია უკანონოდ, ვინაიდან აღმკვეთი ღონისძიება პატიმრობა არ არის მიზანშეწონილი რომ შეეფარდოს. იგი არსად არ გარბოდა, ყოველთვის ცხადდებოდა წინასწარი გამოძიების მსვლელობისას და მის მიმართ შერჩეული აღმკვეთი ღონისძიება არის მკაცრი, ჩვენ ამას ვაპროტესტებთ”, - განაცხადა ვაჟა ჩიტაშვილმა.

ვანო მერაბიშვილის მხარდამჭერ აქციას დაახლოებით 150 ადამიანი ესწრებოდა. აქციაზე იყვნენ ვანო მერაბიშვილის თანასოფლელებიც, რომლებიც მის დაპატიმრებას შეძახილებით აპროტესტებდნენ.

”უდანაშაულო კაცი დაჭერილია, როგორც იესოს არანაირი დანაშაული არ ჰქონდა და დასაჯეს, ისე დაიჭირეს ვანო მერაბიშვილი უდანაშაულოდ. აბსოლუტურად არანაირი დანაშაული არ მიუძღვის ვანოს, პირიქით ყველაფერი კარგი გააკეთა”, - ამბობს სოფელ უდის მკვიდრი თამარ მამულაშვილი.



აქციის მონაწილეები ახალციხეში საკუთარი სახსრებით ჩამოვიდნენ. აქვე იმყოფებოდნენ ადიგენის მუნიციპალიტეტის საკრებულოს თავმჯდომარე, გამგებელი და მისი მოადგილეები. ადიგენის მუნიციპალიტეტის გამგებლის სიმონ პარუნაშვილის თქმით, ის როგორც რიგითი მოქალაქე, ვანო მერაბიშვილის უკანონოდ დაპატიმრებას აპროტესტებს.

”ამხელა საქმეები გააკეთა, მესხეთ-ჯავახეთი ააშენა, წესრიგი დაამყარა. ახლა მას ასეთი რამე უნდა დამართნოდა?! ხომ შეიძლებოდა, რომ ეს ყველაფერი სიტყვით გაკეთებულიყო და არ დაეჭირათ. ყველაფერი ამ კაცმა გააკეთა, ვიხრჩობოდით მტვერში, გზა დააგო, ამხელა რაბათი ააშენა და ამ კაცის დაჭერა როგორ შეიძლება?”, - კითხულობს სოფელ არლის მკვიდრი პავლე კაჭკაჭაშვილი.
აქციაზე მცირე ინციდენტიც მოხდა. იუსტიციის სახლთან შემთხვევით მისულმა ლალი ოდიკაძემ საკუთარ პრობლემებზე ისაუბრა, რაც აქციის მონაწილეეობმა გააპროტესტეს.

ვანო მერაბიშვილის მხარდამჭერი აქცია საქართველოს რამდენიმე რეგიონში მიმდინარეობდა. ახალციხეში აქცია დაახლოებით 40 წუთს გაგრძელდა.



[თამარ თოთაძე, თინათინ ზაზაძე, ახალციხე]