ახალციხის ციხეში მყოფ 'ნაციონალების' აქტივისტს ვანო მერაბიშვილის მხარდასაჭერი პლაკატი ჩამოართვეს

„ერთიანი ნაციონალური მოძრაობის“ ადგილობრივი აქტივისტი ნიკოლოზ ხიზაძე, იმის ნიშნად, რომ ახალციხის ციხე ვანო მერაბიშვილის ინიციატივით აშენდა, შეეცადა კონცერტზე მისი მხარასაჭერი პლაკატი გამოეფინა.

ხიზაძემ პლაკატი წარწერით: „თავისუფლება ვანო მერაბიშვილს“ გაშალა კიდეც, თუმცა, მალევე მასთან ციხის დაცვის წევრები მივიდნენ და პლაკატი ჩამოართვეს.

„ეს ციხე ვანო მერაბიშვილმა ააშენა, თუმცა, დღეს აქ იგი არავის უხსენებია. ამ პლაკატით მინდოდა ჩემი დამოკიდებულება გამომეხატა, თუმცა, ამის საშუალება არ მომცეს“, - ამბობს ნიკლოზ ხიზაძე.

ახალციხის ციხის დირექტორი ელგუჯა ბიჭაშვილი ამ ფაქტს იმით ხსნის, რომ ციხეში კულტურული ღონისძიება მიმდინარეობს და ეს პოლიტიკასთან კავშირში არ არის.

„ეს არის მიზანმიმართული პროვოკაცია. კულტურული ღონისძიებაა და პლაკატის გაშლის უფლება არავის აქვს“, - განაცხადა ბიჭაშვილმა.

შეგახსენებთ, ახალციხის ციხეში დღეს სეზონის გახსნასთან დაკავშირებით კონცერტი მიმდინარეობს.

[sknews.ge]