მეცხოველეობის ბაზარში ვაჭრობის დრო იცვლება

ამ მოთხოვნით ახალციხის მუნიციპალიტეტის გამგეობას შსს ახალციხის რაიონულმა სამმართველომ მიმართა. გამგებლის მოადგილემ მალხაზ ჟუჟუნაძემ კი სოფლის რწმუნებულებს სთხოვა ინფორმაცია თავიანთ ტერიტორიულ ორგანოში გაავრცელონ.

ბაზრობის დაწყების დროის შეცვლის საკითხი დანაშაულებრივი ქმედებების თავიდან ასაცილებლად დადგა: ”ბაზრობა უფრო ადრე იწყება, ვიდრე წესით უნდა დაიწყოს. არ ვიცი ამ დროისთვის დირექცია ვერ თუ არ მიდის სამსახურში, მაგრამ ფაქტია, რომ წვრილმანი ქურდობები ხდება და მათი გამოძიება პოლიციას იმის გამო უჭირს, რომ ეს ყველაფერი ქაოსურად, ბაზრის ტერიტორიის მიღმა ხდება”.

ამიტომ, ჟუჟუნაძის თქმით, სამართალდამცავების მიერ ძნელია იმის დადგენა, დანაშაული ნამდვილად მეცხოველეობის ბაზარში მოხდა, თუ ადგილი სხვა მაქინაციებს ჰქონდა.

ჟუჟუნაძეს ეთანხმება ახალციხის მეცხოველეობის ბაზრის დირექტორი იური გელაშვილი: ”განცხადება გვაქვს გამოკრული, რომ ბაზრობა უნდა დაიწყოს 6 საათზე, მაგრამ ადრე მოდიან, კარი დაკეტილი ხვდებათ და გარეთ ვაჭრობენ. ასე დიდი შანსია, რომ მოპარული საქონელი გაიყიდოს. ასევე, გარეთ ვაჭრობის დროს ფერმერები გადასახადს არ იხდიან”.

ამიტომ, ბიუჯეტში შესატანი თანხა რომ არ დაიმალოს, ჟუჟუნაძემ რწმუნებულები გააფრთხილა, რომ ბაზარში საქონელი გასაყიდად მხოლოდ დილის 6 საათისთვის მიიყვანონ.

[თამუნა უჩიძე, ახალციხე]