რა პირობით იყიდება რძის პროდუქტები ახალციხის ბაზარში

შპს "სავაჭრო ცენტრ ახალციხეში“ [ახალციხის ბაზარი] 17 სექტემბერს, სურსათის ეროვნულმა სააგენტომ რძის პროდუქტების სექციის დახურვის გადაწყვეტილება მიიღო. ამავდროულად, შენახვა–რეალიზაციის პირობების დარღვევის გამო, დირექცია 1000 ლარით დააჯარიმა.

მოგვიანებით, ორი დღის შემდეგ, განმეორებითი შემოწმებისას, ინსპექტირების ჯგუფმა აღმოაჩინა, რომ სექცია დახურული არ იყო და დირექცია განმეორებით, ისევ 1000 ლარით დააჯარიმა.

ბაზრის ახალდანიშნული დირექტორი ნოდარ გოროხოვი ამბობს, რომ დაჯარიმებიდან რამდენიმე დღეში ბაზარში პირობები გამოსწორდა. დღეის მდგომარეობით, ბაზარში რძის პროდუქტების სექცია ისევ მუშაობს.

„ყველაფერი გამოვასწორეთ, სექციაში მაცივარი დავდგით. უმოკლეს პერიოდში მოგვარდება სველი წერტილების პრობლემაც. თვენახევარი გვაქვს ვადა“, - ამბობს გოროხოვი.

შეგახსენებთ, რძის პროდუქტების სექციაში მომუშავეები დირექციისგან სველი წერტილების მოწესრიგებას ითხოვენ. აცხადებენ, რომ ყველს ყიდიან და იმის პირობა არ აქვთ ხელი ხშირად დაიბანონ.

[თინათინ ზაზაძე, ახალციხე]