ბორჯომში საშტატო ნუსხას და ხელფასების ოდენობებს ვერ ამტკიცებენ

დღეს, 1 თებერვალს, ბორჯომის მუნიციპალიტეტის საკრებულოს სხდომა, ქვორუმის არარსებობის გამო ვერ ჩატარდა. სხდომა 12:00 საათზე იყო ჩანიშნული და მას 28 დეპუტატიდან მხოლოდ 13 ესწრებოდა.

როგორც საკრებულოში განაცხადეს, ოპოზიციური პარტიის დეპუტატები: ირმა ზედგინიძე და მამუკა ლურსმანაშვილი სხდომას ჯანმრთელობის მდგომარეობის გაუარესების გამო ვერ დაესწრნენ. მმართველი გუნდის 13 დეპუტატი კი სხდომებს ბოიკოტს უცხადებს.

ბორჯომში საკრებულოს სხდომა, სადაც თვითმმართელობის საშტატო ნუსხასა და ხელფასების გაზრდაზე უნდა ემსჯელათ, უკვე მეორედ გადაიდო. პირველად სხდომა 31 იანვარს იყო ჩანიშნული და მაშინაც ქვორუმის გამო ჩავარდა.

ბორჯომის საკრებულომ მომდევნო სხდომა 28 თებერვალს დანიშნა, თუმცა შესაძლებელია ბორჯომის მუნიციპალიტეტის მერიამ რიგგარეშე სხდომის ჩატარება მოითხოვოს, ვინაიდან, საშტატო ნუსხის დაუმტკიცებლობის გამო მერიაში ხელფასების გაცემა ფერხდება.

[თინათინ ზაზაძე, ბორჯომი]