„ახალციხის ციხის“ წლიური ანგარიშის წარდგენა ხმაურის ფონზე

დღეს, 29 სექტემბერს, ახალციხის ციხის დირექტორმა, ზაზა თამარაშვილმა, რომელიც ამ პოზიციაზე 9 აგვისტოს დაინიშნა, ახალციხის საკრებულოს დეპუტატებს ტურისტული სეზონის შესახებ ანგარიში ჩააბარა და ობიექტის პრობლემებზე ისაუბრა.

ზაზა თამარაშვილმა წელს ციხეში შესულ ტურისტების რაოდენობასა და მიღებულ ფინანსებზე ისაუბრა. ასევე, დაასახელა ის რამდენიმე საკითხი, რაც მისი აზრით, ციხის ეფექტურად მუშაობისთვის, პირველ რიგში უნდა მოგვარდეს.

ციხის დირექტორის განმარტებით, პირველ რიგში მოსაწესრიგებელია ინფრასტრუქტურული მხარე, რისთვისაც საჭიროა 35 000 ლარი; საჭიროა, ციხეს ჰქონდეს დამოუკიდებელი წყალმომარაგების სისტემა; დაზიანებების გამო, უნდა შეიცვალოს საკონცერტო სცენა, ასაწყობი სცენით; აუცილებელია გიდების ოთახი ციხის ზედა ნაწილში, კარიბჭეზე მოეწყოს და ამავე ტერიტორიაზე დაემატოს კომერციული ობიექტები;
გარდა ამისა, ადმინისტრაცია ფიქრობს, რომ ტურისტული ნაკადის სწორად ორგანიზებისათვის, ციხის ზედა ნაწილში, კიდევ ერთი სალარო და საინფორმაციო ცენტრის კონსულტანტი უნდა დაემატოს.

"იცით, რომ მთავარი ობიექტი ციხის ზედა ტერიტორიაზეა, ხოლო ტურისტები შედიან ქვედა ტერიტორიიდან. ეს ქმნის გარკვეულ უხერხულობებს. როცა ტურისტი მოდის დასათვალიერებლად, პირველ რიგში, უნდა დაათვალიეროს ობიექტი. მაგრამ ვფიქრობ, რომ არ უნდა მოიშალოს ქვედა სალაროც“, – განმარტა სხდომაზე ზაზა თამარაშვილმა.

გარდა ამისა, დირექტორის თქმით, კარგი იქნება, თუ თანხა, რომელსაც ციხე სხვადახვა ფართის გაქირავებიდან იღებს, ციხის ბიუჯეტში შევა: „ხელშეკრულებებს დებს ციხის ადმინისტრაცია და თანხა შედის ახალციხის მერიის ანგარიშზე. რაც ჩვენ გვქონდა დაგეგმილი, იმაზე დაახლოებით 17 000 ლარით მეტია შემოსული. ამიტომ თხოვნით გვინდა შევიდეთ მერიაში, რომ მოხდეს ჩვენი ბიუჯეტის კორექტირება და ეს თანხა დაიხარჯოს ისევ ციხის განვითარებისათვის, თუ ეს შესაძლებებლია“.

ფინანსურმა საკითხმა ხმაური გამოიწვია. დეპუტატების ნაწილი ამბობს, რომ ახალციხის ციხეში ყველაზე მნიშვნელოვანი პრობლემა დროის მენეჯმენტია, – ტურისტები კომპლექსში შესვლას ვერ ასწრებენ, რადგან ციხე 19:00 საათზე იკეტება.

„იცით რამდენი ავტობუსი გადის უკან იმის გულისთვის, რომ ციხეს შვიდ საათზე კეტავთ?! აბა ამუშავეთ ერთხელ ცხრა საათამდე, როგორ იქნება. ფული ჩვენ კი არ უნდა დაგიმატოთ, აქეთ მოსატანია. მთელი ზაფხული ტურისტი ჩამოდის ახალციხეში, რჩება სასტუმროში, მაგრამ ციხეზე არ ადის, იმიტომ, რომ დაკეტილია. მიიღეთ სხვა ხალხი და დაამატეთ ორი საათი“, – განაცხადა საკრებულოს დეპუტატმა კობა გელაშვილმა.

დროის გახანგრძლივებას დაეთანხმა ზაზა თამარაშვილი: ,,როდესაც შემდეგი წლის ბიუჯეტი შედგება, აუცილებლად უნდა იყოს გათვალისწინებული გარკვეული თანხები საბონუსე სისტემისათვის. დამატებით როცა ავიყვანთ თანამშრომლებს, შეგვეძლოს, რომ ადამიანებს, რომლებიც დაკავებული იქნებიან იქ, ჰქოდეთ შესაბამისი ანაზღაურება“.

საკრებულოს სხოდმაზე იმყოფებოდა სამცხე–ჯავახეთის ეროვნული მუზეუმის დირექტორი, ციური ლაფაჩიც. მან 2011 წლიდან, ციხის რეაბილიტაციის შემდეგ, მუზეუმში შექმნილ პრობლემებზე ისაუბრა. ციური ლაფაჩის თქმით, მუზეუმს ეფექტურად მუშაობისათვის საკმარისი ტერიტორია სჭირდება, რომელიც არ აქვს.

მისი თქმით, რეაბილიტაციამდე დაწესებულებაში 11 საგამოფენო დარბაზი იყო, ამ მასალების უმრავლესობა კი დღეს საცავებშია. ეს მაშინ, როცა ტურისტების დაინეტერსება ისტორიული მუზეუმით დიდია და სეზონზე ყოფილა დღე, როცა 3000 –4 000 ადამიანი მისულა მუზეუმში.

"ექსკურსია–მძღოლები იმდენად არიან დატვირთული, რომ აბსოლუტურად სწორი იქნება, თუ ზემოთ იქნება მათი ოთახი. გიდი ჯერ უნდა ჩამოვიდეს ქვედა განყოფილებაში, მერე უნდა ავიდეს და ამაში ეკარგება დრო. მუზეუმი არის გადატვრთული და როცა ვამბობთ, რომ არის მოგება და შემოსავალი, აი, ამ მუზეუმიდან არის ეს ყველაფერი. როდესაც ყიდულობს ტურისტი ბილეთს, ის, პირველ რიგში, მუზეუმს კითხულობს“, – ამბობს ციური ლაფაჩი და ამატებს,–"მუზეუმი იმ კონტექსტში, რომელშიც ჩვენ ვიყავით, აღარ გვაქვს. გარდაიცვალა ძველი ციხე, გარდაიცვალა მუზეუმიც“.

გარდა პრობლემებისა, დეპუტატებმა და ციხის ადმინისტრაციამ ყურადღება ახალ პროექტზეც გაამახვილეს. იგი ახალციხის ციხის ენერგოეფექტურ განათებას გულისხმობს.

"140.000 ლარს იხდის წელიწადში ციხე განათებისათვის. ახლა მერიამ შეისყიდა პროექტი, რომელიც 55 ათასი ლარი დაჯდა, ამ თანხას ორი საერთაშორისო კომპანია ფარავს. პროექტის მიხედვით, მზის ენერგიის გამოყენებით, ელექტროენერგიის ხარჯი განულდება. 140 000 ლარი, რომელსაც ელექტროენერგიაში იხდიდა, დარჩება ციხეს და მოხმარდება მის კეთილდღეობას. რაც შეეხება დაფინანსებას, ციხე დოტაციაზეა, 200 000 ლარს იღებს, ჯერ არ ვიცით, დარჩება თუ არა იგივე თანხა“, – განაცხადა ქალაქ ახალციხის საკრებულოს თავმჯდომარემ დავით ლომიძემ.

[თაკო ფეიქრიშვილი, ახალციხე]