ახალციხის ციხეს ნარჩენებისგან ასუფთავებენ

- ”გუშინ ღამე დავასუფთავეთ მთლიანი ტერიტორია. დილის ცხრა საათისთვის უკვე მზად ვიყავით ტურისტების და სტუმრების მისაღებად”, - ამბობს ახალციხის ციხის დირექტორი ნოდარ გოროხოვი.

ციხის ტერიტორიაზე დასუფთავების სამუშაოები ამ დრომდე გრძელდება. 15-20-კაციანი ჯგუფები ციხის ზედა და ქვედა ტერიტორიებს ასუფთავებენ.

- ”დილის შვიდი საათიდან გავაგრძელეთ მუშაობა. ამ ეტაპზე სცენის დემონტაჟი მიმდინარეობს, ცენტრალურ ქუჩებში სხვა ჯგუფები მუშაობენ”, - ამბობს რაფიკ მელქონიანი, რომელიც ქვედა ციხეში ძირითადი სცენის მიმდებარე ტერიტორიას ასუფთავებს.

გუშინ ღამესვე დასუფთავდა ქალაქ ახალციხის ქუჩებიც. შპს ”კეთილმოწყობის” სამსახურის 40 თანამშრომელი ქალაქს ორი საათის განმავლობაში ასუფთავებდა. სამსახურის უფროსის ამირან ნოზაძის თქმით, განსაკუთრებით რთული მდგომარეობა ავტოსადგურის მიმდებარე ტერიტორიაზე იყო, სადაც ეკრანი იყო დამონტაჟებული. ასევე, წრიული მოძრაობის ადგილებში.

- ”როგორც კი გახსნა დამთავრდა, ქალაქის დასუფთავება დავიწყეთ. ციხის ტერიტორია არ გვევალებოდა, მაგრამ ავტომანქანებით დავეხმარეთ და გუშინ ღამესვე დასუფთავდა ციხეც”, - განუცხადა ”სამხრეთის კარიბჭეს”ამირან ნოზაძემ.





[თინათინ ზაზაძე, ახალციხე]