სამცხე–ჯავახეთის უნივერსიტეტში რექტორის არჩევნების ჩატარების თარიღი ცნობილია

რექტორის არჩევნებში მონაწილე კანდიდატთა რეგისტრაცია 12 დეკემბერს დაიწყება და 26 დეკემბრს დასრულდება.

უნივერსიტეტის რექტორს აკადემიური საბჭო ფარული კენჭისყრით აირჩევს, სიითი შემადგენლობის უმრავლესობით, 4 წლის ვადით.

რექტორობის კანდიდატი შეიძლება იყოს პირი, რომელსაც აქვს დოქტორის ან მასთან გათანაბრებული აკადემიური ხარისხი და უმაღლეს საგანმანათლებლო დაწესებულებაში ადმინისტრაციულ, სასწავლო და სამეცნიერო სფეროში მუშაობის გამოცდილება.

რექტორის არჩევნებში მონაწილე კანდიდატმა დოკუმენების შემდეგი ნუსხა უნდა წარადგინოს:

ა). განცხადება - სსიპ სამცხე-ჯავახეთის სახელმწიფო უნივერსიტეტის საარჩევნო კომისიის სახელზე;
ბ) ავტობიოგრაფია (CV);
გ) პირადობის დამადასტურებელი დოკუმენტის ასლი;
დ) დოქტორის ან მასთან გათანაბრებული აკადემიური ხარისხის სანოტარო წესით დამოწმებული
ასლი (უცხოენოვანი დოკუმენტის შემთხვევაში სანოტარო წესით დამოწმებული ქართულენოვანი
თარგმანი);
ე) შრომითი გამოცდილების ამსახველი დოკუმენტი (დედანი ან/და სანოტარო წესით დამოწმებული
ასლი);
ვ) სამოქმედო გეგმა.

არჩევნების ორგანიზებას და ჩატარებას უზრუნველყოფს სსიპ სამცხე-ჯავახეთის სახელმწიფო
უნივერსიტეტის საარჩევნო კომისია.

შეგახსენებთ, რომ მიმდინარე წლის 3 ივლისს უნივერსიტეტის მოქმედ რექტორს მერაბ ბერიძეს უფლებამოსილების ვადა ამოეწურა. იმავე დღეს უნივერსიტეტში რექტორის არჩევნები ჩატარდა, თუმცა გამარჯვებული კანდიდატი ვერ გამოვლინდა. ვითარება, კი რომელიც რექტორის არჩევნებმა შექმნა, კანონით არ რეგულირდებოდა.მოგვიანებით უნივერსიტეტში რექტორის მოვალეობის შემსრულებლის დანიშვნასთან დაკავშირებული საორგანიზაციო საკითხები უნივერსიტეტის აკადემიური საბჭოს 2017 წლის 09 ოქტომბრის N44 დადგენილებით დაარეგულირა. 11 ოქტომბერს აკადემიურმა საბჭომ სამ კანდიდატს შორის რექტორის მოვალეობის შემსრულებლად მერაბ ბერიძე აირჩია.

[sknews.ge]