‘ნაციონალების’ აქტივისტების ცემაში ბრალდებულებთან საპროცესო შეთანხმება გაფორმდება

დღეს, 11 იანვარს ახალციხის რაიონულ სასამართლოში „ნაციონალების“ აქტივისტის ცემის საქმეზე მორიგი სასამართლო პროცესი გაიმართა. სხდომას ხუთივე ბრალდებული ესწრებოდა ,თუმცა პროცესზე მოსვლა ვერ შეძლეს დაზარალებულებმა.

მხარეებს შორის საპროცესო გარიგებაზე მოლაპარაკებები თითქმის დასრულებულია, თუმცა რადგან დაზარალებულებმა სამსახურეობივი მოვალეობის შესრულების გამო პროცესზე მოსვლა ვერ შეძლეს, სხდომის გადადება გახდა საჭირო.

მორიგი სასამართლო პროცესი 29 იანვარს, 12:00 საათზე ჩაინიშნა.

შეგახსენებთ, რომ შემთხვევა მიმდინარე წლის 16 ივლისს სოფელ ურავლის ტყეში მოხდა. ბეგლარ კაპანაძის ნაამბობის მიხედვით, იგი მამასთან და შვილთან ერთად მთიდან ბრუნდებოდა, როდესაც სამი მანქანით გზა გადაუკეტეს და პოლიტიკური მოტივით – არჩევნებზე რატომ იყავი „ნაციონალების“ მხარესო, ფიზიკურად გაუსწორდნენ.

ბეგლარ კაპანაძის ოჯახის წევრების ცემის საქმეზე, პროკურატურამ პასუხისგებაში ხუთი პირი მისცა გრიგოლ რუხაძე, ნოდარ კურტანიძე, ზაზა გელაძე, გიორგი ლონდარიძე და დავით სამსონიძე. ხუთივე მათგანი სხვადასხვა დროს ახალციხის მერიაში, ან მერიას დაქვემდებარებულ უწყებაში მუშაობდა, ორი ახლაც მუშაობს. ხუთივე მათგანი სასამართლომ, 3 აგვისტოს, გირაოს სანაცვლოდ გაათავისუფლა.

[თინათინ ზაზაძე, ახალციხე]