‘ნაციონალების’ აქტივისტების ცემაში ბრალდებულები საპროცესო შეთანხმებას ითხოვენ

„ნაციონალების“ აქტივისტების ცემის საქმეზე წინასასამართლო სხდომა დღეს, 25 დეკემბერს გაიმართა. სხდომას ხუთივე ბრალდებული ესწრებოდა: გრიგოლ რუხაძე, ნოდარ კურტანიძე, ზაზა გელაძე, გიორგი ლონდარიძე და დავით სამსონიძე. დაზარალებულები: ბეგლარ კაპანაძე, მისი მამა და შვილი კი სასამართლო დარბაზში არ გამოჩენილან. როგორც "სამხრეთის კარიბჭესთან" ბეგლარ კაპანაძემ განაცხადა, მას სასამართლოდან სხდომის გამართვის თაობაზე შეტყობინება არ მისვლია.

დღევანდელ სხდომაზე მხარეებს არც მტკიცებულები წარუდგენიათ და არც მათი გამოკვლევა დაუწყიათ, რადგან, დაცვის მხარემ სხდომის გადადება ითხოვა.

„ბრალდებულები დანაშაულს აღიარებენ, ამიტომ, ორი კვირის წინ ჯერ საპროცესო შეთანხმებაზე მივმართეთ პროკურატურას, შემდეგ კი განრიდებაზე. პასუხი ჯერ არ ვიცით, იმედია დადებითად გადაწყდება“, – განაცხადა ბრალდებულების ადვოკატმა ზაზა გორდელაძემ.

საქმეზე შემდეგი სასამართლო სხდომა 2018 წლის 11 იანვრს ჩაინიშნა.

შეგახსენებთ, რომ შემთხვევა მიმდინარე წლის 16 ივლისს სოფელ ურავლის ტყეში მოხდა. ბეგლარ კაპანაძის ნაამბობის მიხედვით, იგი მამასთან და შვილთან ერთად მთიდან ბრუნდებოდა, როდესაც სამი მანქანით გზა გადაუკეტეს და პოლიტიკური მოტივით – არჩევნებზე რატომ იყავი „ნაციონალების“ მხარესო, ფიზიკურად გაუსწორდნენ.

ბეგლარ კაპანაძის ოჯახის წევრების ცემის საქმეზე, პროკურატურამ პასუხისგებაში ხუთი პირი მისცა. ხუთივე მათგანი სხვადასხვა დროს ახალციხის მერიაში, ან მერიას დაქვემდებარებულ უწყებაში მუშაობდა, ორი ახლაც მუშაობს. ხუთივე მათგანი სასამართლომ, 3 აგვისტოს, გირაოს სანაცვლოდ გაათავისუფლა.

[ლუბა გიორგაძე, ახალციხე]