მესამედ გადადებული საპროცესო შეთანხმება

ახალციხის რაიონულ სასამართლოში დღეს 19 მაისს „ლენდოს“ ყაჩაღობაში ბრალდებულის საქმეზე მორიგი სხდომა გაიმართა. პროცესზე მოსამართლე მარიკა ჩიტაშვილს ბრალდებისა და დაცვის მხარის მიერ მიღწეული საპროცესო შეთანხმება უნდა დაემტკიცებინა. თუმცა დაცვის მხარემ ისევ სხდომის გადადების შესახებ იშუამდგომლა.

ბრალდებულის ადვოკატის, ნუგზარ სამარჯიშვილის თქმით, საპრფოცესო შეთანხმებასთან დაკავშირებით გადაწყვეტილება უკვე მიიღო, თუმცა დაცვის მხარის სურვილია, რომ გადაწყვეტილებაში ბრლადებულთან ერთად კორექტივები შეიტანოს და ამისთვის მეტი დრო სჭირდება: "პროკურატურის გადაწყვეტილების მიუხედავად, ჩვენ გვირჩევნია მოლაპარაკება გავაგრძელოთ და უკეთეს ვარიანტზე შევთანხმდეთ, ამიტომ გადავადებინე სასამართლო სხდომა, თან ეს გადაწყვეტილება დასაბუთებული და გააზრებული უნდა იყოს მხარეებისათვის“, – ამბობს სამარჯიშვილი.

რა პირობებზე არიან ამ დროისთვის საპროცესო გარიგებასთან დაკავშირებით მხარეები შეთანხმებული, არც ადვოკატი და არც პროკურორი არ ასაჯაროვებს.

„არ გვინდა ჯერ ამაზე საუბარი, რადგან ვფიქრობ, რომ მერე ეს საბოლოო გადაწყვეტილებაზე გავლენას მოახდინოს“, – ამბობს სამარჯიშვილი.

შემდეგი სასამართლო სხდომა, სადაც დაცვის მხარე ირწმუნება, რომ საპროცესო შეთანხმება აუცილებლად დამტკიცდება 31 მაისს 15:00 საათზე ჩაინიშნა.

შეგაცხენებთ, რომ მხარეები „ლენდოს“ დაყაჩაღებაში ბრალდებულისათვის საპროცესო შეთანხმების მიღწევას უკვე თვეზე მეტია ცდილობენ.
ახალციხეში კომპანია "ლენდოს" ფილიალი მიმდინარე წლის 16 თებერვალს დააყაჩაღეს. გამოძიება ახალციხელ შუახნის მამაკაცს ყაჩაღობასა და ცეცხლსასროლი იარაღის მართლსაწინააღმდეგო შენახვა–ტარებას ედავება. საქმეზე ძიება სსკ–ს 179–ე და 236–ე მუხლებით მიმდინარეობს.

[ლუბა გიორგაძე, ახალციხე]