‘ნაციონალების’ აქტივისტის ცემის საქმეს სახალხო დამცველის აპარატი სწავლობს

„თავად მოგვმართეს დაზარალებულებმა და ამ საქმის შესწავლა ამიტომ დავიწყეთ“, – გვითხრეს სახალხო დამცველის საზოგადოებასთან ურთიერთობის სამსახურში.

„ნაციონალების“ აქტივისტისა და მისი ოჯახის წევრების ცემის საქმეზე პასუხისგებაში მიცემული ხუთი პირია. მათ შორის სამი საბიუჯეტო ორგანიზაციის თანამშრომელია. ამ დრომდე სამივე მათგანი, - ახალციხე-ადიგენის მაჟორიტარი დეპუტატის ბიუროს სამსახურის უფროსი ზაზა გელაძე, ახალციხის მერის წარმომადგენელი დავით სამსონიძე და შპს „კეთილმოწყობის“ სამსახურის უფროსი გიორგი ლონდარიძე პოზიციებს ინარჩუნებენ.

„ახალგაზრდა იურისტთა ასოციაციის“ იურისტის ქეთევან ბებიაშვილის თქმით, რომელიც აღნიშნულ საქმეში თავიდანვე ჩაერთო, ბრალდებულებს უფლებამოსილება იმ შემთხვევაში შეუწყდებოდათ, თუ მათ მიმართ აღკვეთის ღონისძიებად პატიმრობა იქნებოდა გამოყენებული: „თუმცა ხუთივეს გირაო შეეფარდა. ამიტომ სასამართლოს გადაწყვეტილებამდე მათ ჩვეულებრივ უფლება აქვთ იმუშაონ, თუმცა თუ საპროცესო გაფორმდება ეს ავტომატურად გამამტყუნებელ განაჩენს გულისხმობს და მაშინ უფლებამოსილების შეწყვეტის საკითხი დადგება“.

პროკურატურაში აცხადებენ, რომ ამ დრომდე არცერთ ბრალდებულს საპროცესო შეთანხმების გაფორმების მოთხოვნით უწყებისთვის არ მიუმართავს.

სასამართლოში კი აცხადებენ, რომ წინა სასამართლო სხდომა დაახლოებით სექტემბრის შუა რიცხვებში გაიმართება: „ზუსტი თარიღი ჯერ არ ვიცით, რადგან პროკურატურას ეს სისხლის სამართლის საქმე სასამართლოში არ შემოუტანია“.

შეგახსენებთ, რომ შემთხვევა 16 ივლისს სოფელ ურავლის ტყეში მოხდა.
ბეგლარ კაპანაძის ნაამბობის მიხედვით, იგი მამასთან და შვილთან ერთად მთიდან ბრუნდებოდა. ზემოაღნიშნული პირები კი ბუნებაში ერთ–ერთი მღვდლის დაბადების დღის აღსანიშნავად იყვნენ შეკრებილი. კაპანაძე ამბობს, რომ მას სამი მანქანით გზა გადაუკეტეს და პოლიტიკური მოტივით – არჩევნებზე რატომ იყავი „ნაციონალების“ მხარესო, ფიზიკურად გაუსწორდნენ მასაც და მის მამასა და შვილსაც. სამივე დაშავებული, ნოდარ, ბეგლარ და ზურაბ კაპანაძეები სასწრაფო დახმარების ჯგუფმა საავადმყოფოში გადაიყვანა. სამივე მათგანს მრავლობითი დაჟეჟილობები და ტრამვები ჰქონდა.

[sknews.ge]