შშმ ბავშვებისათვის საახალწლო ღონისძიება მოეწყო

ღონისძიების მიზანი ახალციხის, ადიგენის და ასპინძის მუნიციპალიტეტებში მცხოვრები ნულიდან შვიდ წლამდე განსაკუთრებული საჭიროების მქონე ბავშვების წინასაახალწლო განწყობის შექმნა იყო. ბავშვებს შესაძლებლობა მიეცათ გაეცნოთ ერთმანეთი და ჩართულიყვნენ სხვადასხვა ჯგუფურ აქტივობებში.

ღონისძიება ახალციხის N1 ბაგა-ბაღში ჩატარდა. ბავშვებს გასართობის ცენტრის „ბეიბი ბუმი“-ს ანიმაციური ფილმის პერსონაჟები და სანტა კლაუსი ესტუმრნენ და გაამხიარულეს, ახალციხის ნამცხვრისა და პიცის სახლმა კი ბავშვებს საჩუქრად ტორტი და ტკბილეული გადასცა.

„ძალიან კმაყოფილი ვარ, ჩემი შვილიც ძალიან გახარებულია, ბევრი ვიმხიარულეთ“, - ამბობს მშობელი ნათია ფართლაძე.

საქართველოს პორტიჯის ასოციაციის ცენტრი ახალციხეში სამცხე–ჯავახეთის სახელმწიფო უნივერსიტეტის ბაზაზე სექტემბრიდან მოქმედებს.
ბავშვთა ადრეული განვითარების პროგრამა 7 წლამდე ასაკის განვითარების შეფერხების და შეზღუდული შესაძლებლობების მქონე ბავშვებს და მათ ოჯახებს ემსახურება და მათ განვითარებას და სოციალურ ინტეგრაცის უწყობს ხელს.





[მარიამ ბარძიმაძე, ახალციხე]