ახალციხეში განვითარების შეფერხების რისკის მქონე ბავშვებს უფასოდ იკვლევენ

ახალციხეში კონსულტაციის, ინტერვენციის და თერაპიის ცენტრის გამოცდილი სპეციალისტები იმ ბავშვების ოჯახის წევრებს უწევენ კონსულტაციებს, რომლებსაც სამედიცინო, ქცევითი, ემოციური, ან მეტყველების განვითარებასთან დაკავშირებული ჩივილები აქვთ. რეგიონის მასშტაბით კონსულტაციებისთვის ჩაწერილი 30 ბავშვია.

„ჩვენ ვცდილობთ ადრეულ ეტაპზევე აღმოვაჩინოთ ბავშვის განვითარებაში რაიმე შეფერხება და გადავამისამართოთ მშობელი იქ, სადაც რეაბილიტაციისთვის სწორი ჩარევა მოხდება. ასევე, ვცდილობთ ვასწავლოთ მშობლებს, როგორ ჩაერთონ ბავშვის ადრეულ განვითარებაში, როგორ განავითარონ მისი რესურსები და ჩართონ არსებულ სერვისებში“, – ამბობს „პირველი ნაბიჯის“ ფსიქოლოგი რუსუდან სამხარაძე.

განვითარების ეტაპების ჩამორჩენის მქონე ერთ–ერთი ბავშვის მშობელი ამბობს, რომ ადრეულ ეტაპზევე ჩარევას დიდი მნიშვნელობა აქვს: „ასეთი აქციები მშობლებს ძალიან გვეხმარება. საკმაოდ ბევრი ბავშვია ასეთი პრობლემებით რეგიონში და დღევანდელი აქციის საშუალებით იგებენ, როგორ იმუშაონ პატარებთან და როგორ შეძლონ მათი სწორად განვითარება“.

ის ვისაც ბავშვი კონსულტაციებზე უკვე დიდი ხანია დაჰყავს, ამბობს რომ შედეგი ძალიან დიდია: „რადიკალურად, 180 გრადუსითაა ბავშვი შეცვლილი. ვიდრე რეაბილიტაციას დავიწყებდით არ იცოდა არაფერი ფაქტობრივად, მას შემდეგ მეტყველება დაიწყო, ბაღში ეკონტაქტება ბავშვებს“, – ამბობს ერთ-ერთი მშობელი.

უფასო სკრინინგ აქვია ხვალ, 28 ოქტომბერს, ახალციხეში, ფსიქოლოგიური მომსახურების ცენტრში „მწვანე სახლში“ ( კლდიაშვილის ქ. #25-ის მიმდებარედ) გაგრძელდება.



[თორნიკე ზაზაძე, ახალციხე]