რა ღირს ახალი წლის ღამე ახალციხის ბარ–რესტორნებში

რესტორან „ალავერდში“ ახალი წლის ღამისთვის მზადება უკვე დაწყებულია. 31 დეკემბერს სტუმრების განწყობაზე დედაქალაქიდან მოწვეული მომღერლები იზრუნებენ, თუმცა ვინ, ჯერ ამას რესტორანში არ აკონკრეტებენ.

„ალავერდში“ საახალწლო ღონისძიება 23:00 საათზე დაიწყება. ახალი წლის ღამის ალავერდში გატარება, ერთ ადამიანს, დაახლოებით 50 ლარი დაუჯდება. ამ ფასში შედის საახალწლო სუფრა – ხილით, ტკბილეულით და საცივით. რესტორანს 300 ადგილი აქვს, მაგიდების დაჯავშნა უკვე დაწყებულია.

რესტორან „რაბათში“ ახალი წლის ღამეს ანსამბლი „მესხეთი“ იმღერებს, 02:00 საათიდან კი საღამო კლუბური მუსიკით გაგრძელდება. რესტორანს ეყოლება საღამოს წამყვანი. „რაბათში“ ახალი წლის ღამის ფასი 60 ლარიდან იწყება, თანხაში შედის სუფრაც: „ისეთი მენიუა, როგორც ტრადიციულად, საახალწლოდ ოჯახში გაქვს. გოჭი, ინდაური, ტოლმა, მრგვლადმოხარშული დედალი“.


30 ლარიდან იწყება ფასები რესტორან „ტყუპებში“, სადაც ახალი წლის ღამეს იქნება ცოცხალი მუსიკა და წამყვანი.

„დილამდე გაგრძელდება დღესასწაული. სტუმრად მოსულ პატარებს რესტორანი უფასოდ გაუმასპინძლდება და საჩუქრებსაც მიიღებენ. ის ვინც ოჯახით მოვა, ისარგებლებს ფასდაკლებით “, – აცხადებენ რესტორანში.

„ტყუპები“, ახალი წლის ღამეს, 100 სტუმრის მიღებას გეგმავს.

ახალი წლის ღამეს ცოცხალი მუსიკა იქნება და წამყვანი იზრუნებს სტუმრების განწყობაზე რესტორან „ვარძიაშიც“.

„გვექნება ვიოლინოც. ჩვენთან 30–ლარიანი სუფრა იქნება. მენიუ ჯერ შედგენილი არ გვაქვს. ახალი წლის ღამეს კარნავალზე 200 ადამიანის მიღება შეგვეძლება“, – აცხადებენ „ვარძიაში“.

წელს პირველად ექნება საახალწლო ღამე ახალგახსნილ რესტორან „ემიგრანტს“. აქ ერთ ადამიანს, ახალი წლის შეხვედრა საშუალოდ 50 ლარი დაუჯდება. იქნებიან მომღერლები დედაქალაქიდან, საღამოს კი მესხეთის თეატრის მსახიობი მანანა ბერიძე გაუძღვება. „ემიგრანტი“ ყოველ მეხუთე სტუმარს უფასოდ უმასპინძლებს.

„ბევრი სიურპირზი გვაქვს. საახალწლო კარნავალზე გათამაშდება საჩუქრებიც“, – ამბობენ „ემიგრანტში“.

რესტორან „ხარებაში“ ახალი წლის ღამეს 80 სტუმრის მიღებისთვის ემზადებიან. აქ ჯერ არ იციან სტუმრების განწყობაზე ვინ იზრუნებს, თუმცა ამბობენ, რომ ცოცხალი მუსიკა და წამყვანი ახალი წლის ღამეს აუცილებლად იქნება. მენიუც და ერთი პერსონის სავარაუდო ფასიც, ახალ წლამდე რამდენიმე დღით ადრე გაირკვევა.

საახალწლო მზადებაა კაფე–ბარ Golden Time–ში, სტუმრების განწყობაზე აქ წამყვანი და ადგილობრივი მომღერლები იზრუნებენ.

„მენიუ თვითონ სტუმარმა უნდა შეარჩიოს. ჩვენ ყველა კერძი გვექნება, გოზინაყიდან დაწყებული გოჭის ხორცით დამთავრებული. დღესასწაული გაგრძელდება იქამდე, ვიდრე სტუმრებს ენდომებათ“, – ამბობენ Golden Time–ში.

[თინათინ ზაზაძე, ახალციხე]