როგორ ხედავენ მოსწავლეები საგზაო მოძრაობის უსაფრთხოებას

როგორც პროკურატურაში ამბობენ, 10 დღის განმავლობაში პროკურატურაში 50–ზე მეტი ნამუშევარი შევიდა. მათგან, ჟიურიმ, რომელშიც მხატვარი, ფსიქოლოგი და პროკურატურის თანამშრომლები შედიოდნენ, სამი საუკეთესო შეარჩია.

პირველი ადგილი მესამე საჯარო სკოლის მე–11 კლასის მოსწავლეს სოსო მინასიანს ერგო.

„სპიდომეტრი დავხატე. ისარი 160–ზეა გაჩერებული. მის ძირში კი საფლავია დახატული. ამ ნახატით ის ვთქვი, რომ გადაჭარბებული სიჩქარე სამწუხაროდ ხშირად სიკვდილით სრულდება“, – ამბობს მინასიანი.



მეორე ადგილი მეხუთე საჯარო სკოლის პირველი კლასის მოსწავლემ მარიამ ყურაშვილმა დაიკავა: „ორი ბავშვი დავხატე, გზაზე გადადიან, ერთი უყურადღებოა და გზაზე მაშინ გადადის, როცა მწვანე შუქი არ ანთია, ეს საშიშია“.




მესამე ადგილზე გასული მეექვსე სკოლის მეხუთე კლასის მოსწავლე ლუკა მუშირი ამბობს, რომ მისი თანატოლები ხშირად საგზაო მოძრაობის წესებს არ იცავენ: „ხშირად ზებრაზე არ გადადიან და ისე გადარბიან გზაზე. დავხატე ორი მანქანა, ერთი სწრაფად მიდის, მეორე ნელა, თან იქ არის “ზებრა“ და გადადის ხალხი. ნახატს დავაწერე, რომ „ზებრაზე“ მანქანებმა ხალხს უნდა დაუთმონ გზა“.



სამივე გამარჯვებულს ახალციხის რაიონული პროკურატურის პროკურორმა გელა მაღრაძემ სიგელები გადასცა.

„ბოლო დროს ავტოსაგზაო შემთხვევების რიცხვი გაზრდილია. ამ კონკურსით გვინდოდა, რომ მოსწავლეებში უსაფრთხოების თვალსაზრისით თვითშეგნება აგვემაღლებინა“, – აცხადებს მაღრაძე.

კონკურსი საქართველოს პროკურატურის პროექტის „საზოგადოებრივი პროკურატურის“ ფარგლებში ჩატარდა. აღნიშნული პროექტის მიზანი კი დანაშაულის პრევენცია, ასევე პროკურატურისადმი მოსახლეობის ნდობის ამაღლებაა.




[თამუნა უჩიძე, ახალციხე]