ომბუდსმენი: ადამიანის უფლებათა დამცველთა დღის წესრიგში კვლავ არაერთი პრობლემაა

10 დეკემბერი ადამიანის უფლებების დაცვის საერთაშორისო დღეა. 1948 წლის 10 დეკემბერს გაეროს გენერალურმა ასამბლეამ ადამიანის უფლებათა საყოველთაო დეკლარაცია მიიღო, რომელიც ადამიანის უფლებების შესახებ პირველ უნივერსალურ დოკუმენტს წარმოადგენს და ადამიანის უფლებათა საერთაშორისო სტანდარტებს უდევს საფუძვლად. მიუხედავად მისი დეკლარაციული ხასიათისა, ათწლეულების განმავლობაში საყოველთაო დეკლარაცია ჩვეულებითი სამართლის ნორმად ჩამოყალიბდა და მრავალი ქვეყნის კონსტიტუციაში ჰპოვა ასახვა.

"1958 წელს, ადამიანის უფლებათა საყოველთაო დეკლარაციის 10 წლისთავზე, თავის ცნობილ მოხსენებაში ამერიკის შეერთებული შტატების პირველმა ლედიმ ელეონორ რუზველტმა აღნიშნა, რომ ადამიანის უფლებები იწყება ყოველი ადამიანის სახლის სიახლოვეს, იმ გარემოში სადაც ის ცხოვრობს, იმ სკოლაში და კოლეჯში სადაც სწავლობს, იმ ქარხანაში, ფერმაში თუ ოფისში სადაც მუშაობს. ეს არის ადგილები, სადაც თითოეული ქალი, მამაკაცი თუ ბავშვი ისწრაფვის თანასწორობისკენ, თანაბარი შესაძლებლობებისკენ, დისკრიმინაციის გარეშე მოპყრობისკენ. 10 დეკემბერი არის დღე, როდესაც თითოეულმა ჩვენგანმა კიდევ ერთხელ უნდა გაიაზროს, რომ ყველა ადამიანი თანასწორია და აღჭურვილია თანაბარი უფლებებით, რომელთა პატივისცემას უნდა დაეფუძნოს სოციალური, პოლიტიკური თუ ეკონომიკური ცხოვრების ყველა მიმართულება", – განაცხადა საქართველოს ახალარჩეულმა სახალხო დამცველმა ნინო ლომჯარიამ სპეციალურ ღონისძიებაზე, რომელიც დღეს, თბილისში, ადამიანის უფლებების დაცვის საერთაშორისო დღესთან დაკავშირებით გაიმართა.

სახალხო დამცველის შეფასებით, ადამიანის უფლებათა საყოველთაო დეკლარაციის მიღებიდან 70 წლის შემდეგ, შეიძლება ითქვას, რომ თანამედროვე საერთაშორისო საზოგადოებამ მნიშვნელოვან პროგრესს მიაღწია, თუმცა ასევე აშკარაა, ის კომპლექსური გამოწვევები, რომელთაც მსოფლიოს მასშტაბით ვხვდებით.

"დემოკრატიული სივრცის შევიწროვება, უთანასწორობა და დისკრიმინაცია, სიტყვისა და გამოხატვის თავისუფლების შეზღუდვა, ეს არასრული ჩამონათვალია იმ პრობლემების, რომელთა აღმოფხვრაც ადამიანის უფლებათა დამცველთა დღის წესრიგშია", – აღნიშნა ლომჯარიამ.

მისი თქმით, არაერთი გამოწვევის ფონზე, ნათლად იკვეთება ადამიანის უფლებათა ეროვნული ინსტიტუტების, სახალხო დამცველის არსებობის საჭიროება. გაეროს პარიზის პრინციპებთან შესაბამისობაში მყოფი ეროვნული ინსტიტუტები უმნიშვნელოვანეს როლს თამაშობენ ადამიანის უფლებებისა და თავისუფლებების დაცვის საკითხში და მათი რეკომენდაციები და მიგნებები საზოგადოების ინტერესების ლობირებას ემსახურება.

[sknews.ge]