ახალციხის ახალი მერი სამსახურების უფროსებს გაეცნო

ახალციხის ახლად არჩეული მერი ზაზა მელიქიძე, მერიაში 16:00 საათისათვის მივიდა. იგი ახალციხის მერიის სამსახურის უფროსებსა და ყოფილ მერს ვლადიმერ ზედგინიძეს, ახალციხე–ადიგენის მაჟორიტარმა დეპუტატმა გიორგი კოპაძემ და გუბერნატორის მოადგილემ გიორგი მიქელაძემ წარუდგინეს.

რა საკითხებზე ისაუბრა ახალმა მერმა სამსახურის უფროსებთან უცნობია, რადგან შეხვედრას ჟურნალისტები არ დასწრებიან. ზაზა მელიქიძემ განაცხადა, რომ შეხვედრა გაცნობითი ხასიათის იყო: „ჯერ ვეცნობი აქაურობას. საკრებულოს სხდომის შემდეგ სტრუქტურა დამტკიცდება და თანამშრომლობის დანიშვნას კანონის შესაბამისად დავიწყებთ“.

რაც შეეხება საკადრო ცვლილებებს, ზაზა მელიქიძის განცხადებით, განხილვები მიმდინარეობს, თუმცა კონკრეტულად ვინ იქნებიან პოზიციებზე, ჯერ გადაწყვეტილი არ არის.

„მოვედით, რომ ბატონ ვლადიმერს მადლობა გადავუხადოთ გაწეული სამუშაოსათვის და წარვადგინოთ ხალხის მიერ ახლად არჩეული მერი, რომელიც თავის უფლებამოსილების განხორციელებას შეუდგება. ზაზა მელიქიძეს ხალხის დიდი ნდობა აქვს და ეს მიღებული ხმათა რაოდენობითაც დამტკიცდა. იმედი მაქვს, რომ ხალხის ნდობას ბოლომდე გაამართლებს“, – განაცხადა ახალციხე–ადიგენის მაჟორიტარმა დეპუტატმა გიორგი კოპაძემ.

შეგახსენებთ, რომ სამცხე–ჯავახეთში ახალარჩეული მერები უფლებამოსილების შესრულებას დღეიდან, 13 ნოემბრიდან შეუდგნენ. მერის მოვალეობას ჯერ არ ასრულებს ბორჯომის მეორი ტურით არჩეული მერი ლევან ლიპარტია, სადაც ჯერ შემაჯამებელი ოქმი არ დაწერილა.

[ლუბა გიორგაძე, ახალციხე]