პარლამენტის წევრის მიერ მერისთვის გადაცემული "მერობის სერტიფიკატი”

ადგილობრივი ხელისუფლების პირველი პირები – მოსახლეობის მიერ პირდაპირი წესით არჩეული მერები თანამშრომლებს საქართველოს პარლამენტის წევრებმა წარუდგინეს. ზოგიერთ მუნიციპალიტეტში ეს ფუნქცია მხარის გუბერნატორებმა იკისრეს. ამ მხრივ განსაკუთრებით სამეგრელოსა და ქვემო ქართლის გუბერნატორებმა იაქტიურეს.

ნინოწმინდის ერთადერთ ქალ მერს, ანივარდ მოსოიანს “მერის სერტიფიკატი” (საარჩევნო ადმინისტრაციის შემაჯამებელი ოქმი) პარლამენტის მაჟორიტარმა დეპუტატმა ენზელ მკოიანმა საზეიმო ვითარებაში, თანამშრომლებთან წარდგენისას გადასცა, არადა, ამავე შეხვედრაზე საოლქო კომისიის თავმჯდომარეც იმყოფებოდა.

ახალციხეში, ახალი მერის წარდგენისას, მაჟორიტარმა დეპუტატმა გიორგი კოპაძემ კი განაცხადა: „მოვედით, რომ ბატონ ვლადიმერს მადლობა გადავუხადოთ გაწეული სამუშაოსათვის და წარვადგინოთ ხალხის მიერ ახლად არჩეული მერი, რომელიც თავის უფლებამოსილების განხორციელებას შეუდგება. ზაზა მელიქიძეს ხალხის დიდი ნდობა აქვს და ეს მიღებული ხმათა რაოდენობითაც დამტკიცდა. იმედი მაქვს, რომ ხალხის ნდობას ბოლომდე გაამართლებს“.

მერის პირველ სამუშაო დღეს პარლამენტის მაჟორიტარი დეპუტატების გარეშე არ ჩაუვლია რუსთავში, მარნეულში, თეთრიწყაროში, გარდაბანსა და სხვა, არაერთ მუნიციპალიტეტში.

გასაკვირი იქნებოდა, რომ არ დასწრებოდნენ, – ასე აფასებენ ექსპერტები პარლამენტის წევრების მონაწილეობას მერის წარდგენის პროცესში და ფიქრობენ, რომ ცენტრალური ხელისუფლება თვითმმართველობას, როგორც დამოუკიდებელ ინსტიტუტს, არ აღიარებს.

“ეს არის სიმბოლური დადასტურება ვითმმართველობისადმი დამოკიდებულებისა და აღქმისა, თუ როგორ ესმით ცენტრალურ და თავად ადგილობრივ ხელისუფლებას თვითმმართველობა. რეალურად, თვითმმართველობა, როგორც პარლამენტისგან, ისე მთავრობისგან, სრულად დამოუკიდებელი და გარკვეულ საკითხებში თანასწორი ინსტიტუტია, თუმცა, ჩვენი პოლიტიკური ტრადიციების გათვალისწინებით, ადგილობრივ თვითმმართველობას ყველა აღიქვამს, როგორც ცენტრალური ხელისუფლების სტრუქტურულ ერთეულს და გაგრძელებას ადგილებზე. ეს არის დიაგნოზი ჩვენი დემოკრატიისა და დამოკიდებულებისა დამოუკიდებელი ინსტიტუტებისადმი”, – აცხადებს ექსპერტი ლევან ალაფიშვილი.

[sknews.ge]