ახალციხის #1 სკოლიდან გათავისუფლებული პედაგოგები დირექტორის წინააღმდეგ

”მან მოტყუებით დამაწერინა განცხადება. ჩემი მოშორება ”უნდოდა”. ერთ დღეს ორი განცხადება დამაწერინა, ერთი გათავისუფლების თაობაზე და მეორე კვლავ დაბრუნების. ვერ ვხვდები ეს რაში სჭირდებოდა. ფაქტია, მას ჩემი გაშვება უნდოდა”, - ამბობს ხათუნა ყურმაშვილი, რომელიც ერთ-ერთია ორწელიწადნახევრის წინ სკოლიდან გათავისუფლებულ 14 პედაგოგს შორის.

პირველი საჯარო სკოლიდან ყველა პედაგოგი სხვადასხვა მოტივით გაათავისუფლეს. სამსახურის დაკარგვას ნაწილი უპრეტენზიოდ შეხვდა. ნაწილმა კი გათავისუფლებიდან რამდენიმე დღეშივე სკოლაში დაბრუნებისთვის დაიწყო ბრძოლა. მათ შორის იყო სკოლის ყოფილი დირექტორი ზოია ბალიაშვილიც. იგი ამბობს, რომ სკოლის ამჟამინდელ დირექტორს მაკა ჯანაშვილს მისი ეშინოდა და ამიტომ თავიდან მოიშორა.

გათავისუფლებულმა პედაგოგებმა დახმარებისთვის არასამთავრობო ორგანიზაციის ერთსულოვნება საზოგადოების უფლებებისათვის” სამცხე-ჯავახეთის რეგიონულ ოფისს მიმართეს.

”ამ პედაგოგებს მაქსიმალურად დავეხმარები, ბევრი კანონდარღვევა აღმოვაჩინეთ და აუცილებლად ვიბრძოლებ”, - ამბობს ორგანიზაციის თავმჯდომარე ქეთევან ხმალაძე.

დღეს კი ისინი ამავე ორგანიზაციის ოფისში სპეციალურად შეიკრიბნენ და განცხადება ”სამხრეთის კარიბჭესთვის” გააკეთეს. ”სამხრეთის კარიბჭე” ამ პედაგოგების შესახებ მიმდინარე წლის მარტშიც წერდა.

კონკრეტულად რა კანონდარღვევებზე საუბრობენ პედაგოგები, რას ამბობს მაკა ჯანაშვილი და რას ამბობენ რესურსცენტრში, ”სამხრეთის კარიბჭე” დეტალურად ამბებს მოგვიანებით შემოგთავაზებთ.

[ნინო ზედგინიძე, ახალციხე]