სოფელ საძელში გაზიფიცირებას ითხოვენ

ახალციხეში, სოფელ საძელში, 120–მდე კომლი ცხოვრობს. სოფელში გაზი არაა და ამიტომ ყველა შეშით თბება. ადგილობრივები ამბობენ, რომ წლების წინ გაზის სისტემა მიწისქვეშ მიმდებარე სოფლებისთვის მათ სოფელზე გავლით გაიყვანეს, თუმცა საძელში გაზი შეყვანილი დღემდე არაა.

„გარშემო ყველა სოფელში გაზია, თან ჩვენს სოფელზე გაიყვანეს, ხომ შეიძლებოდა საძელშიც დაექსელათ“, – ამბობს ადგილობრივი ალბერტ პოღოსიანი.

ადგილობრივების თქმით, სოფელში ბუნებრივი აირის შეყვანის მოთხოვნით, მათ ადგილობრივ ხელისუფლებას არაერთხელ მიმართეს თუმცა, უშედეგოდ: „ჩვენ ხომ მთავრობა არ გვყავს! როცა გარშემო ყველა სოფელში გაზია, აქ რატომ არ უნდა იყოს?!“

ახალციხის მერიაში აცხადებენ, რომ მუნიციპალიტეტის სოფლებში გაზიფიცირება ეტაპობრივად მიმდინარეობს და 2019 წელს ყველა დასახლებული პუნქტი გაზიფიცირებული იქნება: „მომავალი წლის გაზაფხულზე გაზი საძელსაც ექნება. ამისთვის მეზობელ სოფელში, პატარა პამაჯში, გაზგამანაწილებელი სადგური უკვე დამონტაჟდა“.

ახალციხის სოფლების გაზიფიცირებას შპს „ინტერგაზი“ ახორცილებეს. კომპანიის დირექტორი ვასილ აბულაძე აცხადებს, რომ გაზიფიცირების სამუშაოები გასული წლის დეკემბერში დაიწყო და 2019 წლის გაზაფხულზე დასრულდება: „გაზიფიცირების პროცესი, ახალციხის დაახლოებით შვიდ სოფელში უკვე დაწყებულია, მივყვებით და რა თქმა უნდა სოფელ საძელსაც გავივლით“.

[ლუბა გიორგაძე, ახალციხე]