ცოლის ქამრით ცემაში ბრალდებული სასამართლო დარბაზიდან გაათავისუფლეს

ახალციხის რაიონულ სასამართლოში სხდომა გუშინ, 18 ოქტომბერს გაიმართა. პროცესზე ბრალდებისა და დაცვის მხარეებმა დასკვნით სიტყვები წაიკითხეს, რის შემდეგაც ბრალდებულ გ.კ–ს მოსამართლემ განაჩენი გამოუტანა.

მოსამართლე მარიკა ჩიტაშვილის გადაწყვეტილებით, 27 წლის მამაკაცს ცოლის ქამრით ცემისთვის ერთი წელი პირობითი მსჯავრი შეეფარდა, რომელსაც გ.კ საპატიმროს ნაცვლად სახლში გაატარებს. მსჯავრდებული სასამართლო დარბაზიდან გათავისუფლდა.

აღნიშნული გადაწყვეტილება ადვოკატისთვის ნუგზარ სამარჯიშვილისთვის მოულოდნელი აღმოჩნდა: „ეს გადაწყვეტილება თუ დადგებოდა ნამდვილად არ ველოდი, ვფიქრობდი ექვს თვიან პატიმრობას მისცემდნენ, თუმცა ყველანაირი გირაოსა და პატიმრობის გარეშე, ასეთი გადაწყვეტილება მიიღო მოსამართლემ“.

რის საფუძველზე მიიღო ეს გადაწყვეტილება სასამართლომ, მხარეებს კანონით გათვალსწინებულ, 14 დღის ვადაში ეცნობებათ.

გაასაჩივრებს თუ არა მარიკა ჩიტაშვილის გადაწყვეტილებას ბრალდების მხარე, ამაზე პროკურატურაში კომენტარი არ გაუკეთებიათ.

შეგახსენებთ, რომ 27 წლის მამაკაცს ბრალი სისხლის სამართლის კოდექსის 126–ე, ოჯახში ძალადობის მუხლით ედებოდა. მას გამოძიება ბრალს იმ ქალის ცემაში დებდა, ვისთან ერთადაც ორი წელია ცხოვრობს და შვილი ჰყავს.

[ლუბა გიორგაძე, ახალციხე]