ცოლის ცემაში ბრალდებულ პოლიციელს განაჩენი გამოუტანეს

ახალციხის რაიონული სასამართლოს მოსამართლემ შალვა მჭედლიშვილმა იაკობ ბლუაშვილის საქმეზე განაჩენი, დღეს, 29 ივნისს გამოაცხადა.
იმ შემთხვევაში თუ იაკობ ბლუაშვილი ორ წლის განმავლობაში ახალ დანაშაულს ჩაიდენს, წელიწადნახევრიანი პირობითი მსჯავრი, ამავე პერიოდით საპატიმრო სასჯელად გადაექცევა.

დღესვე, სასამართლოს განაჩენამდე დაცვისა და ბრალდების მხარემ დასკვნითი სიტყვები წაიკითხეს.

„ჩვენ ვითხოვთ გამამტყუნებელი განაჩენის გამოტანას, ბრალდებულის პიროვნების გათვალისწინებით“, – განაცხადა სხდომაზე პროკურორმა მამუკა ქომოშვილმა.

ბრალდებულის ადვოკატმა ნოდარ აკოფაშვილმა კი არასაპატიმრო სასჯელი მოითხოვა: „დნაშაულს აღიარებს და ვიცით, რომ გმამტყუნებელი განაჩენი იქნება, მაგრამ მინდა გაითვალისწინოთ, რომ ოჯახის მარჩენალი იაკობია, მიუხედავად იმისა რომ სამსახური არ აქვს, საოჯახო საქმეებს ის აკეთებს“.

შეგახსენებთ, რომ ძმები პოლიციელები გოჩა და იაკობ ბლუაშვილები 11 აპრილს დააკავეს. შემთხვევა რის გამოც სამართალდამცველები პასუხისგებაში მისცეს ცხრა აპრილს მოხდა. საქმის მასალების მიხედვით, იაკობ ბლუაშვილმა ცოლი სცემა, მისმა ძამამ გოჩა ბლუაშვილმა კი ძმის ცოლი და ძმის არასრულწლოვანი შვილი.

ახალციხის რაიონულმა სასამართლომ დარბაზიდან, გოჩა ბლუაშვილიც ექვს ივნისს საპროცესო შეთანხმების საფუძველზე გაათავისუფლა და ერთი წელი პირობითი მსჯავრი შეუფარდა, ასევე 100 საათით საზოგადოებისათვის სასარგებლო შრომა დააკისრა. იმავე დღეს, მისი ძმა იაკობ ბლუაშვილი 5 000 ლარის გირაოთი სასმართლო დარბაზიდან გათავისუფლდა.

[ლუბა გიორგაძე, ახალციხე]