ცოლის ქამრით ცემაში ბრალდებულს პროკურატურა საპროცესოს არ გაუფორმებს

ცოლის ქამრით ცემაში ბრალდებულის საქმეზე სასამართლო სხდომა დღეს, 11 ოქტომბერს 16:00 საათზე გაიმართა. თავდაპირველად დაცვის მხარეს სხდომის გადადება სურდა იმ მოტივით, რომ პროკურატურისგან საპროცესოს გაფორმების შესახებ პასუხი მიღებული არ ჰქონდა, თუმცა პროკურორმა კახა ლეკიშვილმა განუცხადა, რომ საპროცესო შეთანხმება არ შედგებოდა.

„სამწუხაროდ საპროცესო შეთანხმება, არ შედგება“, – განაცხადა ლეკიშვილმა, თუმცა მიზეზი არ განუმარტავს.

მიუხედავად პროკურორის ამ განცხადებისა, ადვოკატის ნუგზარ სამარჯიშვილის თქმით, აღნიშნულზე ოფიციალური განცხადება არ მიუღია, ამიტომ იმედოვნებს, რომ პროკურატურა დადებით გადაწყვეტილებას მიიღებს.

„ახლა მესმის რომ პროკურატურა უარზეა. ერთ კვირას კიდევ ვითხოვთ, რომ საბოლოო პასუხი მოვიდეს და მერე გავაგრძელოთ სასამართლო სხდომა“, – განაცხადა ნუგზარ სამარჯიშვილმა.

დღესვე პროკურორმა სხდომაზე შესავალი სიტყვაც წაიკითხა. იმ შემთხვევაში თუ ბრალდება საბოლოოდ საპროცესო შეთანხმებაზე უარს იტყვის, ნუგზარ სამარჯიშვილი შესავალ სიტყვას შემდეგ სხდომაზე წაიკითხავს, რომელიც 18 ოქტომბერს ჩაინიშნა.

შეგახსენებთ, რომ 27 წლის მამაკაცს ბრალი სისხლის სამართლის კოდექსის 126–ე, ოჯახში ძალადობის მუხლით აქვს წაყენებული. მას ბრალად ედება იმ ქალის ცემა, ვისთან ერთადაც ორი წელია ცხოვრობს და შვილი ჰყავს.

[ლუბა გიორგაძე, ახალციხე]