ცოლის ქამრით ცემისთვის გასამართლებულს ახლა ცოლის მუქარაში ადანაშაულებენ

„რაც ციხიდან გამოვიდა, ჩემი ოჯახის წევრების ხელყოფით მემუქრებოდა და მეუბნებოდა, რომ ბავშვს წამართმევდა“, – ამბობს ბრალდებულის მეუღლე ც.გ.

მუქარამდე მან ქმარს ქამრით ცემისთვის უჩივლა. მაშინ გ.კ. დაიჭირეს. ბრალდებულს სასამართლომ სამთვიანი განხილვის შემდეგ ერთი წლით პირობითი მსჯავრი შეუფარდა და დარბაზიდან გაათავისუფლა. თუმცა, ციხის დატოვებიდან თვენახევარში ის ისევ დააკავეს, ამჯერად მეუღლემ მას პროკურატურაში მუქარის გამო უჩივლა. თუმცა, სასამართლომ ბრალდებულს აღკვეთის ღონისძიებად გირაო 5 000 ლარი შუფარდა და უკვე მეორედ სასამართლო დარბაზიდან გაათავისუფლა. ახლა ახალციხის რაიონული სასამართლო საქმეს არსებითად იხილავს.

ციხიდან გამოსვლის შემდეგ გ.კ. ცოლთან არ დაბრუნებულა. იგი ყოფილ ცოლს შეურიგდა და ამ დრომდე მასთან ერთად ცხოვრობს.

„თავიდან ვატყუებდი და ვეუბნებოდი, რომ ყოფილ ცოლთან შერიგებული არ ვიყავი. ამას იმიტომ ვაკეთებდი, რომ თუ გაიგებდა პირველ ცოლთან ვცხოვრობდი, ბავშვს აღარ მაჩვენებდა. ერთხელ მასთან ვიყავი, ბავშვს ფოტო გადავუღე და ზუსტად მაშინ ჩემ ტელეფონში ნახა ჩემი ფოტოები, რომლებიც ყოფილი ცოლის დაბადების დღეზე მქონდა გადაღბული, ამაზე იეჭვიანა, გაბრაზდა და პროკურატურაში მიჩივლა. მხოლოდ ეს იყო მიზეზი, თორემ ჩემი მხრიდან არანაირი მუქარა არ ყოფილა“, – ამბობს ბრალდებული გ.კ.

სასამართლოს მისმა ცოლმა ჩვენება უკვე მისცა. ქალმა სხდომაზეც დაადასტურა, რომ მას ბრალდებული დედ–მამის მოკვლით და ძმის დასახიჩრებით ემუქრებოდა.

„ასეთი ჩვენება მან იმიტომ მისცა და მეორედაც იმიტომ უჩივლა, რომ პირველად როცა ქამრით ცემაში დაადანაშაულა, სასამართლომ პატიმრობა არ შეუფარდა, მას კი უნდოდა რომ ეს ციხეში ჩაესვათ“, – ამბობს ბრალდებულის ადვოკატი.

გ.კ. საქმეზე მომდევნო სხდომა შვიდ ივნისს 15:00 საათზეა გაიმართება.

[ლუბა გიორგაძე, ახალციხე]