ცოლის ქამრით ცემაში ბრალდებულისათვის მხარეები საპროცესოზე მსჯელობენ

ახალციხის რაიონულ სასამართლოში, ცოლის ქამრით ცემაში ბრალდებულის სასამართლო სხდომა დღეს, 26 სექტემებრს გაიმართა. პროცესი დაწყებიდან რამდენიმე წუთში გადაიდო.

წინასასამართლო სხდომის გადადება მხარეებმა თავად ითხოვეს, რადგან პროკურატურა ბრალდებულისათვის საპროცესო შეთანხმების საკითხს განიხილავს. პასუხი სავარაუდოდ, 4 ოქტომბერს ჩანიშნულ პროცესზე გახდება ცნობილი.

ბრალდებულის ადვოკატი ნუგზარ სამარჯიშვილი ვარაუდობს, რომ პროკურატურა მის შეთავაზებას დაეთანხმება: "ვფიქრობ, რომ ბრალდება უარს არ იტყვის რადგან, დაზარალებული შეურიგდა ბრალდებულს და პრეტენზიები არ აქვს".

ნუგზარ სამარჯიშვილმა პროკურატურას განცხადებით 12 სექტემბერს მიმართა, რომლის მიხედვითაც იგი ბრალდებულისათვის სამი თვით პატიმრობას ითხოვს. იმ შემთხვევაში თუ პროკურატურის თანხმობაც იქნება, გ.კ საპატიმრო დაწესებულებას 22 ოქტომბერს დატოვებს, რადგან სამ თვიანი პატიმრობის ვადა, სწორედ ამ დროს იწურება.

შეგახსენებთ, რომ 27 წლის მამაკაცს ბრალი სისხლის სამართლის კოდექსის 126–ე, ოჯახში ძალადობის მუხლით აქვს წაყენებული. მას ბრალად ედება იმ ქალის ცემა, ვისთან ერთადაც ორი წელია ცხოვრობს და შვილი ჰყავს.

[ლუბა გიორგაძე, ახალციხე]