როგორ უნდა მოგვარდეს საზოგადოებრივი საპირფარეშოების პრობლემა ახალციხეში -კანდიდატების ხედვები

N2 ვაჟა ჩიტაშვილი – საარჩევნო ბლოკი „ბაქრაძე უგულავა– ევროპული საქართველო“: გავაკეთებ ფასიან საპირფარეშოებს. იქნება პასუხისმგებელი კონკრეტული ადამიანი, რომლიც იქ იმუშავებს და იზრუნებს იმაზე, რომ დაცული იყოს სანიტარული და ჰიგიენური ნორმები.

ყველგან შეიძლება ამის გაკეთება. მუნიციპალიტეტის საკუთრებაში არსებულ ტერიტორიებზე გაკეთდება. თუ იქნება ისეთი ტერიტორია, რომელიც კერძო საკუთრებაშია, გამოვნახავთ საერთო ენას, ადამიანებს კი არ წავართმევთ საკუთრებას, ჩანაცვლებით ან ბიზნეს ინტერესების გაჩენით გავაკეთებთ საპირფარეშოებს.

ხუთი საპირფარეშო მაინც უნდა გაკეთდეს. ტურისტები დადიან, მე ისინი მინახავს რუსთაველის ქუჩაზეც და უნივერსიტეტის მხარეზეც. ძველ და ახალ დასახლებაში, ყველა მიმართულებით უნდა იყოს საპირფარეშო. ამას ააშენებს მერია და ის იქნება პასუხისმგებელი.

N5 ირაკლი ბარძიმაძე – საარჩევნო ბლოკი „ერთიანი ნაციონალური მოძრაობა“: საზოგადოებრივი საპირფარეშოები რა თქმა უნდა პრობლემაა. შეიძლება ამისთვის ადგილები გამოიყოს, მაგრამ სხვადასხვა ობიექტს უნდა შევთავაზოთ და დავაინტერესოთ, რომ მათ ქონდეთ მაღალი დონის კეთილმოწყობილი საპირფარეშოები.

ჩვენ რომ ავდგეთ და პლასტმასის საპირფარეშოები დავაყენოთ ქალაქში, ეს უფრო დაამახნიჯებს ქალაქის იერსახეს.
„ახალციხის ციხის“ ტერიტორიაზე, რომელიც ახლა ნაგავს მიაქვს, უნდა გაკეთდეს აუცილებლად. ჩათვალეთ, რომ ერთ დიდ პრობლემას მოვაგვარებთ. ტურისტების ძირითადი ნაკადი მიდის „ახალციხის ციხეზე“.

N8 ჯუმბერ ინასარიძე – „დავით თარხან მოურავი, ირმა ინაშვილი – საქართველოს პატრიოტთა ალიანსი“: ეს პრობლემა ერთ-ერთი ყველაზე მწვავეა ტურისტული ქალაქისათვის, რომელიც სასწრაფოდ გადასაჭრელია. პირველ რიგში საჭიროა, დავაინტერესოთ კერძო ინვესტორები. შემდგომ კი გამოიძებნოს საამისოდ ადგილები, სადაც მოეწყობა საზოგადოებრივი ტუალეტები.

თუ ასეთები არ მოიძებნა, მერიამ სასაწრაფოდ თვითონ უნდა გააშენოს და შემდგომ გადასცეს სამართავად კერძო სექტორს, რომელსაც ხელშეკრულებით განესაზღვრება ექსპლუატაციის პირობები და ფასი.

N31 ჯიმშერ გოგოლაური – „თავისუფლება – ზვიად გამსახურდიას გზა“: ქალაქში არის ადგილები, სადაც განთავსდება საპირპარეშოები და რა თქმა უნდა იქნება უფასო.

N41 ზაზა მელიქიძე – „ქართული ოცნება– დემოკრატიული საქართველო“: ახალციხის მუნიციპალიტეტს დიდი ტურისტული პოტენციალი გააჩნია. ამიტომ ჩემთვის ერთ-ერთი მთავარი პრიორიტეტი ტურისტული ინფრასტრუქტურის სრულყოფა-განვითარება იქნება.

ნამდვილად საჭიროა ქალაქში საზოგადოებრივი საპირფარეშოების მოწყობა. ამჟამად არსებული და დაკეტილი საპირფარეშოები გაიხსნება. დამატებით კი საჭირო ადგილებზე აშენდება ახალი საპირფარეშოები, რომლებსაც ეყოლება თავიანთი მეთვალყურე, რომელიც გაუწევს მომსახურებას.

[თინათინ ზაზაძე, ახალციხე]