როგორ აპირებენ ქუჩის ძაღლების პრობლემის მოგვარებას ახალციხის მერობის კანდიდატები

N2 ვაჟა ჩიტაშვილი – საარჩევნო ბლოკი „ბაქრაძე უგულავა– ევროპული საქართველო“
არსებობს კანონი ძაღლების ყოლის შესახებ და ის უნდა ავამოქმედოთ. პარალელურად, უნდა მოხდეს ამ ძაღლების თავშესაფრების გაკეთება არა ბიუჯეტის ხარჯზე, არამედ, უნდა მოვიძიოთ და დავაინტერესეთ კერძო სტრუქტურები, რომლებიც დაინტერესდებიან ამ უპატრონო ძაღლების მოვლა–შენახვით. ზოგი ჰუმანური კუთხით შეხედავს. ზოგს შესაძლოა ბიზნეს ინტერესებიც გავუჩინოთ. მაგალითისთვის გეტყვით, რომ გადავცეთ ქალაქში ობიექტი და ვუთხრათ, რომ ამასთან ერთად 5 წლის განმავლობაში ვალდებული ხართ თქვენ, რომ უპატრონი ძაღლებს მოუაროთ და გყავდეთ თავშესაფარში.

იყვნენ ადამიანები,რომლებსაც ყოფილი სასაზღვროს ტერიტორიაზე სტუდენტური ქალაქის გაკეთება უნდოდათ, ამ ადამიანებს გავესაუბრებით და შევთავაზებთ გადმოგცემთ ამ ადგილს, მაგრამ მოუვლით ძაღლებს 4–5 წლის მანძილზე. ეს პრობლემა 80%–ით გადაიჭრება. არ ვაპირებთ ძაღლები გავწყვიტოთ და არც ვაპირებთ რომ ძაღლების შესანახად სახელმწიფო ბიუჯეტიდან დაიხარჯოს თანხა.

N5 ირაკლი ბარძიმაძე – საარჩევნო ბლოკი „ერთიანი ნაციონალური მოძრაობა“
ჩვენ გვაქვს ამაზე სპეციფიკური ხედვა. აუცილებლად უნდა გაკეთდეს ძაღლების თავშესაფარი. ამაში ჩართული იქნება მოსახლეობა, ინვესტორი, დაინტერესებული პირი. უნდა გაკეთდეს თავშესაფარი, თუმცა ამას გააკეთებს პიროვნება, რომელიც ამ საქმით დაინტერესდება და შესაბამისი გამოცდილებაც ექნება. მას ექნება თანაინვესიტრება. ქალაქგარეთ გაკეთდება თავშესაფარი.

უპატრონო ძაღლებს შორის არის ჯიშიანი ძაღლებიც. ვინც ამ თემით დაინტერესდება, ჩვენ გავუწევთ ლობირებას მის პროექტებს. შევახვედრებთ ანალოგიურ თემებზე მომუშავე არასამთავრობოებებს, როგორც საქართველოში, ასევე საზღვარგარეთ მომუშავე ორგანიზაციების წარმომადგენლებს.

იქნება მუნიციპალიტეტის თანამონაწილეობა, – მუნიციპალიტეტი პრობლემის მოსაგვარებლად გასცემს თანხას, თუმცა არ იფიქრებს მოგებაზე. ეს თავდაპირველად იქნება 200 000–დან 300 000–მდე, შემდგომ წლებში უფრო ნაკლებს გაიღებს მუნიციპალიტეტი. ეს არის დიდი თანხა, თუმცა უპატრონო ძაღლებიც დიდი პრობლემაა.

N8 ჯუმბერ ინასარიძე – „დავით თარხან მოურავი, ირმა ინაშვილი – საქართველოს პატრიოტთა ალიანსი“
თავშესაფარი დაფინანსება - ნაწილობრივ, ბიუჯეტით და ნაწილობრივ, კერძო ინვესტიციებით. თანდათან მთლიანად კერძო ინვესტიციებზე გადასვლით.

N31 ჯიმშერ გოგოლაური – „თავისუფლება – ზვიად გამსახურდიას გზა“
აუცილებლად უნდა გაკეთდეს უპატრონო ძაღლთა თავშესაფარი.

N41 ზაზა მელიქიძე – „ქართული ოცნება– დემოკრატიული საქართველო“

საკითხი ცდება მუნიციპალიტეტის მასშტაბებს, შემუშავებულია პროექტის ძირითადი კონცეფცია, მომზადდება ინტერ მუნიციპალური პროექტი, რომლის ფარგლებში მოეწყობა შესაბამის სტანდარტებზე გათვლილი რეგიონული ძაღლების თავშესაფარი. პირველად მუნიციპალიტეტში უპატრონო ძაღლებზე ვიზრუნებთ.

[თინათინ ზაზაძე, ახალციხე]