ახალციხის მერობის კანდიდატების ხედვები პარკინგის პრობლემის მოგვარებაზე

N2 ვაჟა ჩიტაშვილი – საარჩევნო ბლოკი „ბაქრაძე უგულავა– ევროპული საქართველო“: ქალაქში დარჩა ადგილები სადაც შეიძლება საპარკინგე ტერიტორიები გამოიყოს. ქალაქის მერიამ ცენტრალურ ქუჩებზე უნდა გამოყოს ადგილები, მაგალითად კოსტავას ქუჩაზე უნდა დაიხაზოს და ადამიანებს ავტომანქანების გაჩერების საშუალება უნდა მიეცეს. შეიძლება ქალაქმა ვერ აიტანოს, მაგრამ უნდა გამოინახოს ადგილი, დაიხაზოს და კეთილმოეწყოს. მიმდებარე ქუჩებზეც შეიძლება გამოიყოს ადგილი. რომელი ქუჩაც მოგვცემს ამის საშუალებას გავაკეთებთ, ეს იქნება უფასო პარკინგი, ქალაქის ბიუჯეტის ხარჯზე. ყველაფერს კომერციული თვალით არ უნდა შევხედოთ.

N5 ირაკლი ბარძიმაძე – საარჩევნო ბლოკი „ერთიანი ნაციონალური მოძრაობა“: პარკინგის პრობლემა ძირითადად ცენტრალურ ქუჩაზეა. ჩვენ გვაქვს გეგმაში კულტურის სახლის მშენებლობა. გვაქვს რამდენიმე პროექტი, ეს უნდა გაკეთდეს მსხვილბიზნესთან თანაინვესტირებით. ამ შემთხვევაში პარკირების პრობლემა ნაწილობრივ გადაწყდება, რადგან კულტურის სახლის უკან არის ეზო, სადაც შეიძლება ორდონიანი პარკინგი გაკეთდეს. ინვესტორი ახალ კულტურის სახლს ააშენებს, სადაც პირველ სართულზე სავაჭრო ცენტრს გახსნის, მეორე სართულზე კი კულტურის სახლი იქნება, მის უკან კი პარკინგი.

N8 ჯუმბერ ინასარიძე – „დავით თარხან მოურავი, ირმა ინაშვილი – საქართველოს პატრიოტთა ალიანსი“: ქალაქში, სადაც შესაძლებელია, უნდა გაშენდეს მიწისქვეშა ავტოსადგომები და ავტოსადგომისათვის მცირე, მაგრამ აუცილებელი გადასახადი დაწესდეს, რათა არავის გაუჩნდეს სურვილი სამასი მეტრი გაიაროს სამსახურამდე ავტომანქანით და სამსახურის დამთავრებამდე დაიკავოს ადგილი, ქალაქის ცენტრში, ავტოსადგომზე. რაც გაათავისუფლებს ადგილებს იმისათვის, რომ ქალაქში შემოსულ სტუმარს ჰქონდეს საშუალება რამოდენიმე წუთით გააჩეროს მანქანა.

N31 ჯიმშერ გოგოლაური – „თავისუფლება – ზვიად გამსახურდიას გზა“: პირველ რიგში სწორად უნდა იყოს დახაზული საპარკინგე ადგილი, რაც თავისებურად მოაგვარებს ამ პრობლემას.

N41 ზაზა მელიქიძე – „ქართული ოცნება– დემოკრატიული საქართველო“: ჩემთვის ცნობილია, რომ ქალაქში აღნიშნული საკითხი მოსაგვარებელია, განსაკუთრებით გადატვირთულია ქალაქის ცენტრალური ქუჩები. ამიტომ, მოხდება დამატებითი ტერიტორიების გამოყოფა და პარკინგის მოწყობა. მოსახლეობას საშუალება ექნება ნორმალურ პირობებში დააპარკინგონ კუთვნილი ავტომობილები.

[თინათინ ზაზაძე, ახალციხე]