სასამართლომ ასპინძის გამგებლის მიმართ საქმის წარმოება შეწყვიტა

ახალციხის რაიონული სასამართლოს მოსამართლის გოჩა ჯეირანაშვილის გადაწყვეტილებით, ასპინძის მუნიციპალიტეტის გამგებლისა და ამავე მუნიციპალიტეტში დამოუკიდებელი მერობის კანდიდატის ლევან ცაბაძის წინააღმდეგ ადმინისტრაციული საქმის წარმოება შეწყდა.
მოსამართლის განმარტებით, საქმის მასალების მიხედვით, არ დგინდება, რომ უშუალოდ ცაბაძემ დაავალა ააიპ–ების თანამშრომლებს მის მხარდამჭერთა სიაში ხელი მოეწერათ.

„50% პროცენტი ლევან ცაბაძის მხარდამჭერთა სიაში მართლაც ააიპ–ების თანამშრომლების ხელმოწერებია, მაგრამ მტკიცებულებებით არ დგინდება, რომ მათ ეს უშუალოდ ცაბაძემ დაავალა. ამ ააიპ–ების თანამშრომლებს შეეძლოთ რომ მისულიყვნენ და მათი სურვილის მიხედვით ხელი მოეწერათ“, – განაცხადა ჯეირანაშვილმა.

გაასაჩივრებს თუ არა ასპინძის საოლქო კომისია ახალციხის რაიონული სასამართლოს გადაწყვეტილებას ჯერ უცნობია.

შეგახსენებთ რომ ლევან ცაბაძის მიერ ადმინისტრაციული რესურისი შესაძლო გამოყენების ფაქტთან დაკავშირებით N39 ასპინძის საოლქო საარჩევნო კომისიას საერთო სამოქალაქო მოძრაობა „მრავალეროვანი საქართველომ“ მიმართა. საჩივარი საოლქო კომისიამ 21 სექტემბერს განიხილა.

N39 ასპინძის საოლქო საარჩევნო კომისიის თავმჯდომარის ნიკოლოზ ლოლაძის განცხადებით, ცაბაძის მხრიდან წინასაარჩევნოდ გამოყენებული იქნა სამსახურეობრივი მდგომარეობა.

საოლქო კომისიამ ცაბაძეს აღნიშნულზე სამართალდარღვევის ოქმი (N100081) შეუდგინეს. რომლის მიხედვითაც ცაბაძემ საარჩევნო კოდექსის 49–ე მუხლის პირველი პუნქტის „ა“ ქვეპუნქტი დაარღვია, რაც გულისხმობს „ სამსახურებრივად დაქვემდებარებული ან სხვაგვარად დამოკიდებული პირის ჩაბმას ისეთ საქმიანობაში, რომელიც ხელს უწყობს კანდიდატის წარდგენას ან/და არჩევას“. ამავე კოდექსით აღნიშნული დარღვევა 2 000 ლარით ჯარიმდება.

[sknews.ge]