ასპინძის საოლქო საარჩევნო კომისიას ახალი თავმჯდომარე ჰყავს

ასპინძის საოლქო საარჩევნო კომისიის თავმჯდომარის თანამდებობაზე მხოლოდ ერთი კანდიდატი იყო წარდგენილი.

კომისიამ, რომელშიც საოლქოს ექვსი მუდმივმოქმედი და შვიდი პარტიების მიერ დასახელებული წევრია, კომისიის თავმჯდომარედ ყოფილი მდივანი ნიკოლოზ ლოლაძე აირჩია.

როგორც ლოლაძე „სამხრეთის კარიბჭესთან“ განმარტავს, სახელობითი კენჭისყრა ჩატარდა, რომელზეც წევრებს პოზიცია ხელის აწევით უნდა დაეფიქსირებინათ.

სახელობითი კენჭისყრითვე აირჩიეს საოლქო საარჩევნო კომისიის ახალი მდივანიც. ეს პოზიცია ახალდანიშნულმა კომისიის წევრმა ნინო ბერიძემ დაიკავა.

ასპინძის საოლქო საარჩევნო კომისიის ახალი თავმჯდომარე ამავე საოლქოში 2010 წლიდან მუშაობს. იგი ჯერ კომისიის დროებითი წევრი იყო, 2012 წლიდან კი მდივანი.

შეგახსენებთ, რომ ასპინძის საოლქო კომისიის ყოფილმა თავმჯდომარემ როსტომ მაგრაქველიძემ თანამდებობა 1 სექტემბერს დატოვა. იგი ამ პოზიციას 11 წლის განმავლობაში იკავებდა. როგორც მოგვიანებით გაირკვა, როსტომ მაგრაქველიძე „ქართულმა ოცნებამ“ თვითმმართველობის არჩევნებისთვის ასპინძის მერობის კანდიდატად დაასახელა.

[ლუბა გიორგაძე, ასპინძა]