რომელ შენობაში განთავსდება ახალციხის მერია

ამჟამად ახალციხეში ახალციხის მუნიციპალიტეტის გამგეობა შალვა ახალციხელის N2-შია განთავსებული, ქალაქის მერია კი კოსტავას N18-ში. მერიის შენობის რემონტი თვითმმართველი ქალაქის შექმნის შემდეგ 2014 წელს დაიწყო და 2016 წელს დასრულდა. ქალაქში ახალი ადმინისტრაციული შენობის გასარემონტებლად 511 356 ლარი დაიხარჯა.

რომელ შენობაში იმუშავებს ახალშექმნილი ახალციხის მუნიციპალიტეტის მერია, თვითმმართველი ქალაქის სტატუსის გაუქმებისა და არჩევნების დასრულების შემდეგ გაირკვევა.

„ჯერ ეს საკითხი გადაწყვეტილი არ არის“, – ამბობს ახალციხის მუნიციპალიტეტის გამგებელი ზაზა მელიქიძე, რომელიც ამავე დროს ახალციხეში „ქართული ოცნების“ მერობის კანდიდატია.

მისი თქმით, ამ საკითხზე ახალარჩეული მერი და საკრებულო იმსჯელებს: „ჩემი ვარაუდით, ერთ შენობაში იქნება მერია, მეორე შენობაში კი საკრებულო და ააიპ–ები. მაგრამ ეს მხოლოდ ჩემი ვარაუდია. ამ საკითხს არჩევნების შემდეგ არჩეული მერი და საკრებულო გადაწყვეტს“.


მერიის შენობა
[თამუნა უჩიძე, ახალციხე]