ქალაქის მერია ახალ შენობაში გადასვლას აპრილის ბოლოს გეგმავს

კოსტავას ქუჩაზე მდებარე ადმინისტრაციული შენობის რეაბილიტაცია გასულ წელს დაიწყო. ამ შენობაში უნდა განთავსდეს ქალაქ ახალციხის მერია, საკრებულო და მერიას დაქვემდებარებული ააიპ–ები.

„ჩვენი სურვილი იყო, რომ მიმდინარე წლის იანვარში გადავსულიყავით, მაგრამ ჯერ არ არის დასრულებული სარემონტო სამუშაოები. ძირითადი სამუშაოები უკვე დამთავრდა, ახლა მხოლოდ კოსმეტიკური რემონტია დარჩენილი“, – ამბობს გიორგი კოპაძე.

ყოფილი ადმინისტრაციული შენობის რეაბილიტაციისთვის დაახლოებით ნახევარი მილიონი ლარი მუნიციპალური განვითარების ფონდიდან გამოიყო.

გიორგი კოპაძის თქმით, მშენებელ კომპანიას სამუშაოების დასრულებისთვის ვადა ოქტომბრამდე აქვს. თუმცა, ქალაქის მერი ვარაუდობს, რომ ახალ შენობაში მიმდინარე წლის აპრილის ბოლომდე გადავლენ.

[თამარ თოთაძე, ახალციხე]