"ლენდოს" ყაჩაღობაში ბრალდებულისათვის საპროცესო შეთანხმება ვერ ფორმდება

ახალციხის რაიონულ სასამართლოში დღეს, 10 მაისს, კომპანია „ლენდოს“ დაყაჩაღებაში ბრალდებულის საქმეზე სასამართლომ ვერ იმსჯელა. ამის მიზეზი ის იყო, რომ დაცვის მხარემ პროკურატურასთან საპროცესო შეთანხმებას ვერ მიაღწია. ამიტომ ამ საკითხზე სასამართლო 19 მაისს იმსჯელებს.

როგორც ბრალდებულის პ.გ–ს ადვოკატი ნუგზარ სამარჯიშვილი აცხადებეს, პროკურატურას საპროცესო შეთანხმების თაობაზე საბოლოო გადაწყვეტილება ისევ არ მიუღია.

აღნიშნულის თაობაზე კი სამარჯიშვილმა ბრალდების მხარეს ჯერ კიდევ 11 აპრილს მიმართა და ბარალდებულისათვის, ერთი ან ორი წლით თავისუფლების აღკვეთა მოითხოვა.

"ეს არის ბოლო თარიღი, სასამართლო სხდომებს მეტად აღარ გადადებს. პროკურატურა ან გადაწყვეტილებას მიიღებს ან საქმის არსებითი განხილვები გაგრძელდება", – ამბობს ბრალდებულის ადვოკატი ნუგზარ სამარჯიშვილი.

შეგახსენებთ, რომ ახალციხეში კომპანია "ლენდოს" ფილიალი მიმდინარე წლის 16 თებერვალს დააყაჩაღეს. გამოძიება ახალციხელ შუახნის მამაკაცს ყაჩაღობასა და ცეცხლსასროლი იარაღის მართლსაწინააღმდეგო შენახვა–ტარებას ედავება. საქმეზე ძიება სსკ–ს 179–ე და 236–ე მუხლებით მიმდინარეობს.

[ლუბა გიორგაძე, ახალციხე]